Në Shqipëri janë shëruar 40 persona
Zëvëndësministrja e Shëndetësisë në Shqipëri, Mira Rakacolli, ka bërë të ditur se numri i personave që janë shëruar nga COVID-19 ka arritur në 40.
“Vetëm gjatë 24 orëve të fundit janë shëruar 7 persona”, ka thënë Rakacolli.
Sipas saj aktualisht në Shërbimin Infektiv në Tiranë janë të shtruar 76 persona të infektuar me koronavirusin e ri.
Numri i përgjithshëm i të infektuarve ka arritur në 212 raste. Vetëm gjatë 24 orëve janë konfirmuar 15 raste me koronavirus.
Ndërkaq, 10 persona deri më tani kanë humbur jetën si pasojë e sëmundjes COVID-19 që e shkakton koronavirusi i ri SARS-COV-2.
Në Kosovë po dezinfektohen paratë e gatshme
Banka Qendrore e Republikës se Kosovës ka njoftuar se në vazhdimësi po dezinfekton ndërtesën dhe paratë e gatshme. Ky proces po ndodh, në kuadër të masave për parandalimin e përhapjes dhe mbrojtjes nga pandemia, thuhet në një përgjigjje për Radion Evropa e Lirë nga zyrtarë të BQK-së.
“Banka Qendrore e Republikës së Kosovës ka marrë të gjitha masat e duhura konform vendimeve dhe udhëzimeve të organeve kompetente", thuhet në përgjigje.
Kryeministri indian kërkon falje për izolim
Kryeministri Indian, Narendra Modi u ka kërkuar falje indianeve për vendosje të masës së izolimit.
Pas kritikave rreth mungesës së planifikimit para izolomit, e cila është vendosur në më pak se katër orë pas njoftimit, Modi ka kërkuar falje për ndikimin që mund të ketë pasur ky vendim në jetët e njerëzve.
“Me siguri shumë persona janë zemëruar me mua për izolim në shtëpitë e tyre. Unë i kuptoj shqetësimet e tyre, mirëpo nuk ka pasur mënyrë tjetër për të luftuar koronavirusin. Për një shtet si India me popullësi 1.3 miliard dollarë, ekziston një betejë mes jetës dhe vdekjes, të cilët duhet ta fitojmë”, ka thënë mes tjerash Modi.
Deri më tani, India ka raportuar për 987 persona të infektuar me sëmundjen Covid-19, që shkakton koronavirusi, derisa 25 të tjerë kanë vdekur.
Edhe dy të vdekur nga koronavirusi në Maqedoni të Veriut
Dy persona kanë ndërruar jetë nga koronavirusi në Maqedoninë e Veriut, duke e çuar në gjashtë numrin e përgjithshëm të të vdekurve nga COVID-19.
Bëhet fjalë për dy burra të moshës 31 dhe 91 vjeç, njoftoi ministri i Shëndetësisë, Venko Filipçe.
Sipas tij, pacienti më i moshuar ishte shtruar në spital para tetë ditëve në gjendje të rënda sikur edhe 31-vjeçari nga Shkupi, i cili gjatë ditës së shtunë kishte një përkeqësim të rëndë të gjendjes shëndetësore.
Ministri i Shëndetësisë nuk njoftoi për ndonjë sëmundje paraprake të 31 vjeçarit.
Filipçe informoi edhe për 18 raste të reja me koronavirus, me çka numri i të infektuarve ka arritur në 257, nga të cilët shtatë janë të sëmurë rëndë, por asnjë pacient aktualisht nuk është në një aparat të frymëmarrjes.