Mbyllet Aeroporti Ndërkombëtar i Sarajevës
Aeroporti Ndërkombëtar i Sarajevës, nga sot, është mbyllur për trafik të pasagjerëve, por do të mbetet i hapur për fluturime humanitare dhe trafik mallrash.
Ky vendim është marrë si masë për frenimin e përhapjes së koronavirusit në Bosnje e Hercegovinë, ku tashmë janë regjistruar 350 raste të të infektuarve.
Sektori i shërbimeve të mallrave në aeroport do të vazhdojë të marrë dhe dërgojë mallra, kanë thënë autoritetet.
Këshilli i Ministrave i Bosnjës ka marrë vendim për mbylljen e përkohshme të aeroporteve edhe në Mostar, Banja Llukë dhe Tuzlla.
Komisionari për Ekonomi i BE-së: Projekti evropian, në rrezik
Bashkimi Evropian tha të hënën se mosmarrëveshjet e vendeve anëtare për politikat ekonomike gjatë pandemisë së koronavirusit, rrezikojnë ta ndajnë projektin evropian.
Paralajmërimi u bë nga komisionari për Ekonomi i BE-së, Paolo Gentiloni.
“Është e qartë se dallimet ekonomike midis vendeve evropiane, në vend që të zvogëlohen përballë një krize si kjo, ato po rriten. Do të jetë shumë e vështirë ta mbajmë bashkë projektin evropian”, tha Gentiloni.
Të enjten, Gjermania dhe shtetet e tjera veriore të BE-së e refuzuan një propozim të mbështetur nga nëntë vende, përfshirë Italinë, Spanjën dhe Francën, për të ashtuquajturat “bono-detyrime për koronën”.
Ato do të lëshoheshin në emër të Eurozonës si tërësi dhe do të ishin borxh i përbashkët i shteteve anëtare.
Vendet anëtare evropiane duhet të "fillojnë me objektiva të përbashkëta", tha Gentiloni.
"Kemi nevojë për një instrument të ri të garantimit të papunësisë dhe një plan për mbështetjen e biznesit”, tha mes tjerash ai.
Dy vendet me numrin më të madh të viktimave nga koronavirusi janë Italia dhe Spanja – të dyja anëtare të BE-së.
Si duket koronavirusi?
Në një video-grafikë të agjencisë së lajmeve Reuters tregohet forma e koronavirusit, i cili deri më 30 mars ka prekur mbi 720,000 persona dhe ka lënë të vdekur mbi 34,000 të tjerë.
Numri i të infektuarve në Gjermani arrin në mbi 57,000
Agjencia e shëndetit publik në Gjermani, e njohur si Instituti Robert Koch, tha se numri i të infektuarve me koronavirus në këtë vend ka arritur në 57,298 – nga 4,751 sa ka qenë të dielën.
Landi jugor i Bavarisë, ku sëmundja është shfaqur për herë të parë në Gjermani, ka numrin më të madh të rasteve.
Numri aktual i viktimave është 455.
Gjermania është vendi i pestë në botë me numrin më të madh të të infektuarve.
Para saj vijnë: Shtetet e Bashkuara, Italia, Kina dhe Spanja.
Edhe kancelarja gjermane, Angela Merkel, është testuar për koronavirus, por ajo ka dalë negative.