Në Shkup regjistrohet edhe një viktimë nga koronavirusi
Në Maqedoninë e Veriut është regjistruar edhe një viktimë nga koronavirusi duke e çuar numri e të vdekurve në 7, ka bërë të ditur ministri i Shëndetësisë, Venko Filipçe, në një postim në rrejtin social Facebook.
Ai ka njoftuar se viktima është një grua 79 vjeçe nga Dibra pasi ishte diagnostikuar me Covid-19 më 23 mars dhe pas përkeqësimit të gjendjes shëndetësore ishte shtruar në klinikën e Shkupit më 25 mars.
Sipas Ministrisë së Shëndetësisë, në 24 orët e kaluara janë regjistruar 26 raste të reja me koronavirusi me çka numri i përgjithshëm i pacientëve të diagnostikuar me COVID-19 ka arritur në 285 persona. Kreu i shëndetësisë bëri të ditur se 9 pacientë (8 nga Dibra dhe 1 nga Shkupi) janë shëruar plotësisht nga virusi dhe tashmë janë lëshuar në shtëpitë e tyre.
Ministria e Punëve të Brendshme ka bërë të ditur se masat e qeverisë, respektivisht orën policore nuk e kanë respektuar 263 persona, 99 prej të cilëve janë shoqëruar në polici. Kundër dy personave, Prokuroria themelore publike Shkup ka ngritur padi penale për veprat penale – mosveprim sipas rregullave shëndetësore gjatë epidemisë.
Parlamenti hungarez pritet të votojë projektligjin kontrovers
Parlamenti hungarez pritet t'i japë qeverisë kompetenca të reja për të zbatuar gjendjen e jashtëzakonshme.
Më shumë se 100,000 njerëz kanë nënshkruar një peticion kundër tij.
Por partia konservatore e Fidez e kryeministrit Viktor Orban ka një shumicë të konsoliduar në parlament.
Sipas një sondazhi të agjencisë pro-qeveritare Nezopont, 90% e qytetarwve duan një zgjatje të ligjit të urgjencës, dhe 72% pajtohen që kodi penal të forcohet.
Por partitë opozitare dhe grupet e të drejtave të njeriut akuzojnë qeverinë për përfshirjen e disa masave ekstreme në ligj, për të cilat, siç thonë, asnjë parti opozitare në asnjë demokraci nuk do të mund të pajtohej kurrë.
Këto masa përfshijnë dhënien e kompetencave speciale për qeverinë në një periudhë të pacaktuar, zvogëlimin e kontrollit demokratik dhe kërcënimin e gazetarëve me burgim.
Në këtë kuptim, ata e shohin ligjin si një mashtrim politik nga qeveria.
Këshilla të rëndësishme
Çka do të thotë kontakti i afërt me një person të infektuar? Si transmetohet koronavirusi i ri nga një person në tjetrin? Këto dhe shumë përgjigje tjera lidhur me koronavirusin mund t’i lexoni në KËTU
Thirrje të moshuarve në Kosovë: Mos dilni nga shtëpitë
Instituti Kombëtar i Shëndetësisë Publike në Kosovë (IKSHPK) sërish u bëri thirrje qytetarëve të Kosovës t’i përmbahen rekomandimeve, dhe të mos dalin nga shtëpitë, pa ndonjë nevojë urgjente.
Me theks të veçantë, aty iu bëhet thirrje të moshuarve të qëndrojnë në shtëpi.
“Të nderuar familjarë të të moshuarve, ju lutemi kujdesuni për më të dashurit tuaj të moshuar dhe për nevojat e tyre, duke u siguruar që të mos dalin nga shtëpia”, thuhet në njoftimin e Institutit.
Numri aktual i të infektuarve është 94, ndërsa një pacient ka humbur jetën.
Për shkak të koronavirusit, autoritetet në Kosovë kanë shpallur gjendje emergjente për shëndetin publik.