Tregjet e aksioneve pësuan tremujorin më të keq që nga viti 1987
Tregjet e aksioneve në gjithë botën kanë pësuar humbje historike në tre muajt e parë të këtij viti, për shkak të situatës së krijuar e pandeminë e koronavirusit.
Indeksi Dow Jones, një tregues kyç i tregut të aksioneve në SHBA, ka rënë për 23 për qind – çfarë është rënia më e madhe në një tremujor që nga viti 1987.
Ngjashëm ka ndodhur edhe me indeksin e Londrës, FTSE 100, i cili ka rënë për 25 për qind.
Indeksi S&P 500, i cili mat performancën e aksioneve të 500 ndërmarrjeve të mëdha, të listuara në bursat në Shtetet e Bashkuara, ka humbur 20 për qind të vlerës gjatë tremujorit të kaluar – çfarë paraqet rënien më të madhe qysh në vitin 2008.
Dobësimi vjen pasi autoritetet kanë urdhëruar ndalimin e shumicës së aktiviteteve, në përpjekje për të ngadalësuar përhapjen e koronavirusit.
Ekonomistët kanë paralajmëruar se goditja në ekonominë globale ka të ngjarë të jetë më e keqe sesa kriza financiare e 2008-ës.
"Mbetemi shumë të shqetësuar për parashikimin negativ të rritjes globale në vitin 2020”, ka thënë shefja e Fondit Monetar Ndërkombëtar, Kristalina Georgieva.
QKUK publikon të dhënat e fundit për pacientët me COVID-19
Në Klinikën Infektive të Qendrës Klinike Univerisitare të Kosovës (QKUK), gjashtë persona të prekur me koronavirus janë duke u trajtuar me okigjenoterapi, ndërsa një pacienteje i është përkeqësuar gjendja.
“Një paciente ndodhet në kujdesin intensiv të klinikës dhe ka përkeqësim të gjendjes, është në ventilim mekanik”, thuhet në njoftimin e QKUK-së.
Në këtë institucion aktualisht janë të shtrirë 43 të sëmurë me COVID-19, sëmundjen që e shakton koronavirusi.
Sipas QKUK-së, shumica e tyre janë në gjendje stabile.
“Sa i përket stafit të Klinikës Infektive, të testuar pozitivë me COVID-19 vazhdojnë të jenë tri infermiere, në gjendje të mirë shëndetësore, prej të cilave dy janë duke u trajtuar në klinikë, ndërsa njëra është e vetizoluar në shtëpi”, thuhet në njoftim.
Në Kosovë, aktualisht janë të regjistruara 112 raste me koronavirus, një pacient ka vdekur dhe gjashtë janë shëruar.
Disa këshilla të Organizatës Botërore të Shëndetësisë:
Si dhe kur duhet të përdoret maska?
Të gjithë ligjvënësit bullgarë do të testohen për koronavirus
Të gjithë ligjvënësit bullgarë do t’iu nënshtrohen testeve për koronavirus, pasi një anëtar i Parlamentit të Bullgarisë ka dalë pozitiv ndaj sëmundjes që e shkakton koronavirusi, COVID-19.
Lajmi u bë i ditur nga kryetarja e parlamentit, Tsveta Karayancheva.
Ligjvënësi që ka dalë pozitiv është Hasan Ademov, tha ajo.
Gjenerali Ventsislav Mutafchiiski, shef i Selisë Qendrore të Operacioneve Kombëtare të Bullgarisë, tha se Ademov është në spital, por nuk dha detaje të tjera.
Parlamenti bullgar, i cili përbëhet prej 240 anëtarësh, ka paralajmëruar mbledhje për buxhetin më 2 prill.
Nuk është ende e qartë nëse takimi do të mbahet sipas planifikimeve.
Deri më 31 mars, Bullgaria ka konfirmuar gati 400 raste të të infektuarve me koronavirus dhe tetë vdekje.
Bullgaria ka mbyllur shkolla, restorante dhe bare dhe ka kufizuar udhëtimin ndërkombëtar së paku deri më 13 prill, në përpjekje për të frenuar përhapjen e koronavirusit.