Aplikacionit Zoom i rriten edhe kritikat, edhe popullariteti
Aplikacioni për video-konferenca, Zoom, është duke u përballur me kritika të reja, në kohën kur i është rritur popullariteti për shkak të pandemisë me koronavirus.
Prokurorja e Përgjithshme e Nju Jorkut, Letitia James, i ka treguar shqetësimet e saj ndaj kompanisë përmes një shkrese, duke përmendur aftësitë e kompanisë për t’u përballur me kërkesat e mëdha të përdoruesve.
Zoom aktualisht është duke u shfrytëzuar nga miliona persona për shkaqe të punës, apo shkollimit, pas masës së izolimit të vënë në shumë shtete.
Megjithatë, së fundmi janë ngritur dilema për masat që aplikon kjo kompani në fushën e sigurisë dhe privatësisë.
Në një përgjigjje për BBC-në, zëdhënësi i kompanisë në fjalë ka thënë: Zoom konsideron se privatësia, siguria dhe besimi i përdoruesve janë jashtëzakonisht serioze”.
“Gjatë pandemisë me Covid-19, ne jemi duke punuar vazhdimisht për të siguruar se spitalet, universitetet, shkollat dhe bizneset tjera në botë, mund të qëndrojnë të lidhura dhe operacionale. Ne vlerësojmë përfshirjen e Prokurores së Përgjitshme të Nju Jorkut në këto çështje dhe jemi të lumtur që mund t’i ofrojmë informacionin e kërkuar”.
Aktualisht ky aplikacioni renditet si aplikacioni i parë më i përdorur në Shtetet e Bashkuara, ndërsa në Britani të Madhe zë vendin e dytë.
Në të kaluarën ky aplikacion është përballur me mangësi të ndryshme në siguri, pasi është raportuar se me raste janë sulmuar pjesëmarrësit nëpër takime dhe janë vjedhur pamjet e ekraneve.
Ky është një vështrim i nivelit mikroskopik i koronavirusit që ka shkaktuar pandemi.
Afër armikut: Detajet e jashtëzakonshme të koronavirusit
Arabia Saudite u kërkon myslimanëve të shtyjnë rezervimet për Haxh
Arabia Saudite u ka kërkuar myslimanëve, që planifikojnë të marrin pjesë në pelegrinazhin e Haxhit, të shtyjnë rezervimet e tyre për shkak të pandemisë me koronavirus.
Ministri i Haxhit, Mohammed Banten ka thënë se Mbretëria Saudite është e shqetësuar për sigurinë e pelegrinëve dhe u ka bërë thirrje njerëzve “të presin para krijimit të kontratave”.
Rreth dy milionë persona ishte pritur që të udhëtonin në Mekë dhe Medinë në korrikun dhe gushtin e këtij viti për të qenë pjesë e ceremonisë fetare.
Myslimanët që janë fizikisht mirë, duhet të kryejnë Haxhin të paktën një herë në jetë.
Pelegrinazhi tjetër, Umra, tashmë është pezulluar, si masë parandaluese kundër përhapjes së koronavirusit.
Njerëzve u është ndalur hyrja në Mekë dhe Medinë, ashtu sikurse edhe në kryeqytetin Riad, teksa autortitetet saudite luftojnë shpërthimin e sëmundjes Covid-19, që ka infektuar të paktën 1,563 persona dhe ka marrë jetën e 10 personave tjerë.
Shkon në 15 numri i viktimave nga COVID-19 në Shqipëri
Në Shqipëri, gjatë 24 orëve të fundit, kanë humbur jetën dy njerëz, duke e çuar në 15 numrin e të vdekurve nga sëmundja COVID-19, që shkaktohet nga koronavirusi.
Silva Bino, nga Instituti i Shëndetit Publik, ka bërë të ditur se viktimat kishin sëmundje shoqëruese.
“Në shërbimin infektiv aktualisht janë 79 të shtruar. Shtatë prej tyre janë në terapi intensive, ndërsa 4 nga këta janë të intubuar. Të tjerët të shtruar në pavion janë në gjendje të stabilizuar deri në këto momente”, ka thënë Bino.
Ajo po ashtu ka bërë të ditur se janë testuar 152 persona, prej të cilëve janë konfirmuar 16 raste të reja me koronavirus.
Në total, Shqipëria ka 259 të infektuar.