Franca regjistron 509 vdekje në 24 orët e fundit
Franca ka thënë se 509 persona kanë vdekur me koronavirus në 24 orët e fundit.
Kjo shifër e dërgon në 4,032 numrin total të të vdekurve nga ky virus nëpër spitalet e këtij shteti.
Shifra e fundit e publikuar, është njëherësh më larta e vdekjeve në territorin francez.
Mbi 200,000 persona të infektuar nga koronavirusi i ri në SHBA
Shtetet e Bashkuara kanë tejkaluar shifrën e 200,000 personave të infektuar me koronavirusin e ri, sipas të dhënave të Universitetit Johns Hopkins.
Kjo pandemi ka marrë jetët e të paktën 4,475 personave në SHBA.
Nju Jorku përbën epiqendrën e përhapjes së virusit në territorin amerikan, pasi aty është raportuar për të paktën 1,900 të vdekur, ka thënë guvernatori, Andrew Cuomo.
Më shumë se tetë nga 10 amerikanë aktualisht janë duke përjetuar një formë të izolimit, me qëllim të parandalimit të përhapjes së virusit.
Shtëpia e Bardhë ka thënë se rreth 240,000 amerikanë mund të vdesin nga sëmundja Covid-19, që shkakton koronavirusi, pavarësisht marrjes së masave të izolimit.
Një ditë në karantinë me tre të rinj nga Kosova
Kanë dy javë që po qëndrojnë në karantinë. Si e kalon një ditë një arkitekte, një menaxher i marketingut dhe një instruktore e zumbas?
Shkon në 125 numri i të prekurve me koronavirus në Kosovë
Instituti Kombëtar i Shëndetësisë Publike ka konfirmuar të mërkurën për 13 raste të reja të prekura me koronavirusin e ri.
“Rastet pozitive janë raste kontakti, 11 prej të cilëve me vendbanim në Topanicë, 1 me vendbanim në Prishtinë dhe 1 me vendbanim në Gjakovë”, është në njoftim.
Aty po ashtu është thënë se të mërkurën është bërë i ditur lajmi për shërimin e katër personave nga sëmundja Covid-19, që shkakton koronavirusi.
Deri më tani në Kosovë është raportuar për 125 persona të prekur dhe një të vdekur me koronavirus.
Autoritetet në Kosovë kanë shpallur gjendje emergjente për shëndetin publik, me qëllim të parandalimit të përhapjes së kësaj sëmundjeje.