Ligjet në fuqi pengojnë pezullimin e përkohshëm të të burgosurve në Kosovë
Frika nga përhapja e koronavirusit nëpër burgje, ka detyruar autoritetet në shtete të ndryshme të botës, të lirojnë një numër të të burgosurve, edhe pse në disa raste, me masa të ndryshme kufizimesh.
Autoritetet e Kosovës nuk bëjnë përjashtim, të paktën në raport me planet e veprimit, në rast se paraqiten raste të COVID-19 nëpër qendrat korrektuese dhe ato të paraburgimit.
Ministrja në detyrë e Drejtësisë në Qeverinë e Kosovës, Albulena Haxhiu, tha për Radion Evropa e Lirë, se ajo personalisht është në favor të një vendimi të mundshëm, që të burgosurit të lirohen përkohësisht nga burgjet. Megjithatë, ajo thotë se një vendim i këtillë, u takon gjykatave.
Po, çka nëse ligjet nuk parashohin situata të këtilla?
Detajet i kuptoni duke klikuar këtu
Foshnja pesëmuajshe infektohet me koronavirus në Kamenicë
Një foshnje pesëmuajshe është prekur nga koronavirusi në Kamenicë, ka thënë infektologu Valbon Krasniqi për Radion Evropa e Lirë.
Ai tha se foshnja po qëndron në shtëpi, dhe se ka dalë pozitive në mesin e 11 personave të testuar të mërkurën nga Instituti Kombëtar i Shëndetësisë Publike.
‘’Në listën e personave të prekur me COVID-19, që kemi pranuar dje në klinikë, në mesin e 11 personave ka qenë edhe një foshnje pesë muajshe’’, ka thënë Krasniqi.
Ai po ashtu ka thënë se gjendja shëndetësore e pacientëve është e mirë, dhe se vetëm njëri nga ta është shtrirë në Klinikën infektive.
Deri më tani në Kosovë është raportuar për 125 persona të prekur dhe një të vdekur me koronavirus.
Autoritetet në Kosovë kanë shpallur gjendje emergjente për shëndetin publik, me qëllim të parandalimit të përhapjes së kësaj sëmundjeje.
QKUK: Një paciente me koronavirus vazhdon të jetë në gjendje të rëndë
Në Klinikën Infektive të Qendrës Klinike Universitare të Kosovës (QKUK), është bërë e ditur se tetë pacientë me koronavirus janë në trajtim me oksigjenoterapi, ndërkaq një paciente, është në kujdes intensiv pasi është në gjendje të rëndë.
Deri më tani në Klinikën infektive janë të shtruar 44 të prekur me COVID-19, sëmundja që shkakton koronavirusi dhe shumica prej tyre janë në gjendje stabile.
QKUK-ja ka thënë po ashtu se katër infermiere që janë prekur me COVID-19 janë në gjendje të mirë shëndetësore, tri prej tyre janë të hospitalizuara ndërkaq njëra është e vetizoluar në shtëpi.
Deri më tani, në Kosovë janë regjistruar 125 raste me koronavirus, një pacient ka vdekur dhe dhjetë janë shëruar.
Autoritetet në Kosovë kanë shpallur gjendje emergjente për shëndetin publik, me qëllim të parandalimit të përhapjes së kësaj sëmundjeje.
Shkencëtarët australianë nisin testimin e vaksinave potenciale për koronavirus
Shkencëtarët në Australi kanë nisur testimin e dy vaksinave potenciale për koronavirus, pasi vaksinat e krijuara nga Universiteti i Oksfordit dhe kompania amerikane, Inovio Pharmaceutical, janë konsideruar të sigurta për testim në kafshë nga Organizata Botërore e Shëndetesisë.
Agjencia kombëtare për shkencë e Australisë do të përcaktojë nëse funksionojnë vaksinat, dhe nëse ato të jenë të sigurta për njerëz.
Testimi i parë në njerëz i një vaksine është realizuar në Shtetet e Bashkuara një muaj më parë, duke u kaluar faza e testimit në kafshë.
Aktualisht janë duke u zhvilluar një varg vaksinash tjera në gjithë botën me një shpejtësi të jashtëzakonshme.
Mirëpo Agjencia australiane ka thënë se testimet do të jenë provat e para gjithpërfshirëse të vaksinave në modelin e kafshëve.
Studiuesit kanë thënë se shpejtësia dhe niveli i bashkëpunimit global, që ka rezultuar me këtë fazë, ka qenë i pashembullt.
“Normalisht duhet një deri në dy vjet për të arritur në këtë pikë dhe ne e kemi shkurtuar atë periudhë në disa muaj”, ka thënë mjeku Rob Grenfell nga kjo agjenci.
Rezultatet e para të testimeve nga kafshët mund të publikohen në fillim të muajit qershor, kanë thënë shkencëtarët.
Nëse dalin të suksesshme, vaksinat mund të barten nëpër klinika tjera për testime.
Megjithatë ekspertët paralajmërojnë se do të duhen të paktën 18 muaj që ndonjë vaksinë potenciale të jetë e gatshme për përdorim në njerëz, bazuar në rregulloret për testim dhe standarde.
