Serbia dhe Hungaria sytë kah Kina, në kohën e pandemisë
Një ish i dërguari me ndikim i Kombeve të Bashkuara dhe Bashkimit Evropian në Ballkan, Carl Bildt, ka folur me shqetësim për sinjalet politike që po dërgon Serbia në kohën e pandemisë së koronavirusit.
Në një intervistë të gjerë dhënë Shërbimit të Ballkanit të Radios Evropa e Lirë më 30 mars, ish-ministri i Jashtëm suedez pranoi se ka pasur një dështim të Evropës karshi pandemisë së COVID-19, por paralajmëroi se mbështetja e liderëve serbë në "kartën e Kinës" mund të dëshmohet si "kundërproduktive”.
Artikullin e plotë mund ta lexoni KËTU
Spanja raporton për 932 vdekje të reja
Në Spanjë gjatë 24 orëve të fundit janë regjistruar 932 vdekje nga koronavirusi, tregojnë të dhënat zyrtare, raporton BBC. Numri i përgjithshëm i vdekjeve ka arritur në 10,935.
Pas Italisë, Spanja është vendi i dytë në botë me më së shumti vdekje të shkaktuara nga koronavirusi i ri.
Kriza e pandemisë mund t'i shtyjë shumë biznese drejt dështimit, vlerëson Banka Qendrore e Kosovës
Asambleja e Përgjithshme e Kombeve të Bashkuara ka miratuar një rezolutë që kërkon "bashkëpunim ndërkombëtar" në luftën kundër pandemisë koronavirus.
Rezoluta e miratuar më 2 prill ishte dokumenti i parë i miratuar nga organizata me 193 vende anëtare për pandeminë që e ka përfshirë botën.
Rezoluta thekson rolin qendror të OKB-së në krizën globale shëndetësore dhe ekonomike dhe i bën thirrje Sekretarit të Përgjithshëm, Antonio Guterres, të udhëheqë mobilizimin dhe koordinimin e një përgjigje globale ndaj pandemisë.
Rezoluta u paraqit nga Zvicra, Indonezia, Singapori, Norvegjia, Lihtenshtajni dhe Gana dhe u miratua me shumicë dërrmuese.
Një rezolutë rivale e paraqitur nga Rusia përmbante gjithashtu bashkëpunimin dhe nevojën për solidaritet përballë sfidave të paraqitura nga koronavirusi i ri, por ajo përfshinte një kërkesë për heqjen e përgjithshme të sanksioneve ndërkombëtare dhe një fund të luftërave tregtare.
Drafti rus kishte mbështetjen e katër vendeve - Republikës Qendrore të Afrikës, Kubës, Nikaraguas dhe Venezuelës - por diplomatët e cituar nga AP thanë se Bashkimi Evropian, Britania, Shtetet e Bashkuara dhe Ukraina kundërshtuan propozimin rus.
Rezolutat e miratuara nga Asambleja e Përgjithshme nuk janë detyruese, por kanë një fuqi politike në varësi të mbështetjes së tyre.
Mali i Zi raporton për shifrat e reja të të infektuarve
Në Mal të Zi janë shënuar 16 raste të reja me koronavirus. Numri i përgjithshëm i të infektuarve ka arritur në 160 persona.
Drejtori i Institutit të Shëndetit Publik, Boban Mugosha, tha se shumica e numrit të përgjithshëm të të infektuarve ishin rezultat i mosrespektimit të masave dhe rekomandimeve të përcaktuara.