Britania mund t’i lehtësojë masat e izolimit nga fundi i majit
Një shkencëtar që këshillon Qeverinë britanike në lidhje me krizën që ka shkaktuar koronavirusi, ka thënë se Mbretëria e Bashkuar mund t’i lehtësojë disa masa të izolimit nga fundi i majit.
Mbretëria e Bashkuar është izoluar nga data 23 mars, duke i mbyllur shkollat, restorantet dhe shumë dyqane.
Njerëzit rekomandohen të dalin jashtë vetëm për gjëra thelbësore ose ushtrime.
“Duam të lëvizim drejt situatës, ku, së paku në fund të majit, do të jemi në gjendje të vendosim disa masa më pak intensive, të bazuara më shumë në teknologji dhe testim”, ka thënë epidemiologu Neil Ferguson.
Nëse numri i rasteve të të infektuarve fillon të bie shpejt, “ne do të jemi në gjendje të lëvizim kah një regjim që nuk do të jetë jetë normale, por diçka më relaksuese në aspektin e distancimit shoqëror dhe të ekonomisë”, ka thënë Ferguson në një intervistë për BBC-në.
Mbretëria e Bashkuar ka mbi 38,000 njerëz të infektuar me koronavirus, ndërsa 3,605 pacientë atje kanë humbur jetën.
Në mesin e të infektuarve është edhe kryeministri britanik, Boris Johnson.
Varlehyi: BE-ja nuk po bën garë me ndihmat për Ballkanin
Komisionari për Zgjerim i Bashkimit Evropian, Oliver Varhelyi, ka thënë në një intervistë për Radion Evropa e Lirë se BE-ja nuk është në garë me asnjë vend tjetër kur bëhet fjalë për ndihmën që e dërgon në vendet e Ballkanit Perëndimor.
Presidenti i Serbisë, Aleksandar Vuçiq, më 15 mars, ka kritikuar hapur Bashkimin Evropian, duke thënë se Kina "mund të na ndihmojë në këtë situatë të vështirë", pas përhapjes së koronavirusit.
Disa ditë më vonë, një aeroplan me ndihma mjekësore kineze dhe një ekip këshillues mjekësor kanë ateruar në aeroportin e Beogradit.
Më 2 prill, Vuçiq ka konfirmuar se ka zhvilluar bisedë telefonike me presidentin rus, Vladimir Putin, dhe se një “ndihmë e rendësishme” po vjen në Serbi.
I pyetur nëse Kina dhe Rusia ishin më të shpejta në ofrimin e ndihmës për disa nga vendet e Ballkanit Perëndimor dhe vendet e Partneritetit Lindor, komisionari Varhelyi ka thënë se BE-ja ka qenë e shpejtë në ofrimin e ndihmës.
Artikullin e plotë mund ta lexoni këtu.
Trump: Vendosja e maskave është çështje vullneti
Presidenti i Shteteve të Bashkuara, Donald Trump, tha se Qendrat për Kontrollin dhe Parandalimin e Sëmundjeve u bëjnë thirrje të gjithë amerikanëve që të vendosin maska kur dalin nga shtëpitë – si masë për frenimin e përhapjes së koronavirusit.
Trump, megjithatë, tha se rekomandimi është çështje vullnetare dhe se ai vetë nuk do ta vendosë maskën.
“Maskat do të jenë një gjë vullnetare. Mund t’i vendosni. Nuk do të thotë se duhet ta bëni. Unë zgjedh të mos e bëj. Mund të jetë një gjë e mirë. Është vetëm rekomandim, me vullnet”, tha Trump.
“Të vendos maskë derisa takoj presidentë, kryeministra, diktatorë, mbretër, mbretëresha – nuk e di. Disi, nuk e shoh për veten time”, tha Trump, edhe pse ka ndaluar të takojë zyrtarë të huaj disa javë më parë.
Udhëzimi nga Qendrat për Kontrollin dhe Parandalimin e Sëmundjeve në SHBA, erdhi pasi SHBA-ja raportoi për mbi 1,400 të vdekur nga koronavirusi, vetëm brenda një dite.
Shtetet e Bashkuara deri më tash kanë mbi 278,000 raste të të infektuarve me koronavirus dhe mbi 7,000 viktima.
Shteti i Nju Jorkut mbetet zona e goditur më së keqi dhe guvernatori Andrew Cuomo ka kërkuar ndihmë nga pjesët e tjera të SHBA-së.
Disa këshilla nga Organizata Botërore e Shëndetësisë:
Si dhe kur duhet të përdoret maska?