Kurti: Muaji prill, vendimtar për daljen nga kriza e pandemisë
Kryeministri i Qeverisë së Kosovës në detyrë, Albin Kurti, tha se institucionet e Kosovës, janë të përkushtuar maksimalisht me çështjen e pandemisë.
Kurti i bëri këto komente në një konferencë për media gjatë një vizite në komunën e Gjilanit.
"Jemi të përkushtuar me punë që ta ndalojmë hovin e koronavirusit. Puna edhe më madhe duhet të vazhdoj në muajin prill. Muaji prill është vendimtar për daljen nga kriza", tha Kurti.
Ai paralajmëroi se qeveria do të zhvillojë më 7 prill një mbledhje online ku do të diskutojë për masat tjera ndaj kësaj situate.
Më 23 mars, Gjykata Kushtetuese ka vendosur që vendimi i 23 marsit 2020 i Qeverisë së Kosovës për të kufizuar lëvizjen e lirë të qytetarëve nuk është në përputhje me Kushtetutën, dhe të njëjtin ta shpallë të pavlefshëm.
Në Kosovë, deri më tash janë konfirmuar 165 raste me koronavirus, përfshirë këtu edhe 24 pacientët që janë shëruar. Tre persona kanë vdekur.
Nga radhët e komunitetit serb, janë infektuar 33 persona, ndërsa një ka vdekur.
Komuniteti serb i raporton rastet e veta në Serbi.
Indonezia u kërkon myslimanëve të praktikojnë ritualet fetare në shtëpi
Indonezia u ka kërkuar myslimanëve të praktikojnë lutjet gjatë muajit të agjërimit, në shtëpi dhe të heqin dorë nga lutjet masive të festës së Bajramit në fund të Ramazanit.
Në Indonezi rreth 85% e popullsisë apo më shumë se 260 milionë banorë janë myslimanë.
Gjatë muajit të Ramazanit, në agim, disa njerëz dalin në rrugë për të ofruar ushqime për të varfërit, dhe në muzg njerëzit e perfundojnë agjërimin së bashku në restorante ose xhami.
Në ditën e Bajramit, e cila bie në fund të majit, fushat e futbollit, parkingjet dhe rrugicat e lagjeve janë përdorur për lutje masive.
QKUK: Dy pacientë në gjendje kritike
Klinika Infektive e Qendres Klinike Universitare të Kosovës ka njoftuar se në repartin e saj janë të hospitalizuar 61 pacientë.
Sipas njoftimit të kësaj klinike, 47 raste janë me COVID-19, ndërkaq për 10 raste priten rezultatet e mostrave, kurse 4 kanë rezultuar negativ në COVID-19.
Nga këto raste, 41 pacientë janë me gjendje stabile ndërkaq, 4 raste kanë nevojë për oksigjenoterapi dhe përkujdesje intensive.
Sipas njoftimit, dy pacientë ndodhen në mjekimin intensiv, dhe janë në gjendje të kritike.
Në Kosovë, deri më tash janë konfirmuar 165 raste me koronavirus, përfshirë këtu edhe 24 pacientët që janë shëruar.
Nga radhët e komunitetit serb, janë infektuar 33 persona, ndërsa një ka vdekur.
Komuniteti serb i raporton rastet e veta në Serbi.
Ministrat e financave të vendeve të BE-së diskutojnë për krizën e pandemisë
Ministrat e financave të BE-së, do të zhvillojnë një video konferencë më 7 prill, për të diskutuar një plan të shpëtimit ekonomik për vendet evropiane, të cilat janë goditur më rëndë nga pandemia e koronavirusit.
Ministrat janë nën presion për të propozuar masa të mëtejshme fiskale në mënyrë që të luftohen ndikimet socio-ekonomike të epidemisë.
Sipas ministrit portugez të Financave, Mario Centeno, për disikutim në tryezë është një "rrjetë sigurie" me vlerë gjysmë trilioni euro.
Gjithashtu në diskutim përfshihete dhe një linjë kredie paraprake nga Mekanizmi Evropian i Stabilitetit, në rast se vendet kanë vështirësi në mbledhjen e fondeve për t'u marrë me pasojat nga pandemia.
Banka Qendrore Evropiane ka njoftuar tashmë një program prej 750 miliardë eurosh për të blerë borxhet e qeverive dhe kompanive, në të gjithë eurozonën, dhe për të lehtësuar ndikimin e shpërthimit të koronavirusit, ndërsa Komisioni Evropian ka relaksuar rregullat buxhetore.