Vetizolohet një ministër i qeverisë britanike
Ministri britanik, Michael Gove, tha të martën se do të izolohet pasi një anëtar i familjes së tij po shfaq simptoma të semundjes COVID-19.
"Në përputhje me udhëzimet, unë po izolohem në shtëpi pasi një anëtar i familjes time filloi të shfaq simptoma të buta të koronavirusit”, tha ai.
Kryeministri britanik, Boris Johnson, e ka kaluar natën në kujdes intensiv të një spitali në Londër, pasi simptomat e tij nga sëmundja COVID-19 u përkeqësuan.
Zyra e tij tha se ai ishte transferuar në repartin intensiv, me këshillën e ekipit të tij mjekësor, dhe po merrte "kujdes të shkëlqyeshëm".
Kryeministri, 55 vjeç, dielën në mbrëmje u dërgua në spital për shkak të "simptomave të vazhdueshme" të koronavirusit.
Johnson njoftoi 11 ditë më parë se ai ishte infektuar me koronavirus. Simptomat e tij përfshinin temperaturë të lartë dhe kollë.
OBSH-ja u thotë vendeve të mos nguten me lehtësimin e masave
Organizata Botërore e Shëndetësisë nuk ka rekomandime të qarta për vendet dhe rajonet lidhur me lehtësimin e masave ndaj pandemisë, por u kërkoi atyre që të mos i heqin ato shumë herët.
"Njëra nga gjërat më të rëndësishme është që të mos hiqen shumë herët masat në mënyrë që të mos kemi një përkeqësim përsëri", tha zëdhënësi i OBSH-së, Christian Lindmeier.
Sipas tij, kjo situatë, është e ngjashme me të qenit i sëmurë vetë.
“Nëse ngritesh shumë shpejt nga shtrati dhe vrapon shumë herët, rrezikon të biesh prapa dhe të kesh komplikime", shtoi ai.
Disa vende në botë kanë paralajmëruar lehtësimin e masave të izolimit dhe të gjenjes së jashtëzakonshme.
Më 6 prill Austria tha se mund të nisë lehtësimin e masave të izolimit nga java e ardhshme, por kërkoi nga qytetarët që të vazhdojnë distancimin fizik, si masë për frenimin e përhapjes së koronavirusit.
Serbia blen 75 respiratorë me paratë e BE-së
Serbia deri më tani ka blerë 75 respiratorë nga paratë që i janë ofruar nga BE-ja, tha ministrja për Integrime Evropiane, Jadranka Joksimoviq.
Ajo i tha televizionit PRVA se këto pajisje mjekësore, nuk kanë arritur ende në Serbi për shkak të kufizimeve të eksportit në disa vende.
Nga zhvillime tjera, më 7 prill, Serbia do të organizojë fluturime për në Paris të Francës dhe Frankfurt të Gjermanisë, për kthimin e shtetasve serbë, ndërsa më 8 Prill, për të njëjtin qëllim, do të ketë një fluturim për në Shtetet e Bashkuara.
Ministri i Jashtëm serb, Ivica Daçiq, tha të hënën se janë 1.500 qytetarë serbë në Gjermani dhe 700 të tjerë në SHBA.
Ai theksoi se destinacionet e largëta nuk janë në rendin e ditës.
Gjashtë raste të reja me COVID-19 në Shqipëri
Në Shqipëri gjatë 24 orëve të fundit janë konfirmuar edhe 6 raste të reja me koronavirusin e ri.
Kështu bëri të ditur, Silva Bino, nga Instituti i Shëndetit Publik.
Numri i përgjithshëm i të infektuarve në Shqipëri ka arritur në 383 raste.
“Gjatë 24 orëve të fundit 15 qytetarë janë shëruar nga sëmundja, duke e çuar numrin e të shëruarve në 131”, tha Bino.
Deri më tani në Shqipëri janë shënuar 22 viktima nga COVID-19.
