Parisi i ndalon ushtrimet jashtë gjatë ditës
Autoritetet në Paris i kanë ndaluar ushtrimet jashtë gjatë ditës, derisa vazhdojnë luftën kundër shpërthimit të koronavirusit.
Rregullat e reja do të vlejnë nga ora 10:00 deri në orën 19:00 dhe do të hyjnë në fuqi të mërkurën.
Në Evropë, Franca është në mesin e vendeve me numrin më të madh të viktimave nga koronavirusi.
Në total, 8,911 njerëz kanë vdekur atje, ndërsa numri i të infektuarve është afër 100,000.
Të martën, ministri i Shëndetësisë i Francës, Olivier Veran, tha se shpërthimi i koronavirusit nuk e ka arritur ende kulmin në këtë vend.
Mbrojtja nga koronavirusi: Pse distancimi shoqëror është kaq i rëndësishëm?
Pse distancimi shoqëror është kaq i rëndësishëm?
Paralajmërohen gjoba për ata që shkelin masat kundër koronavirusit në Kosovë
Kryetari i Komunës së Prishtinës, Shpend Ahmeti, paralajmëroi se personat që nuk i respektojnë rregullat dhe vendimet për parandalimin e koronavirusit do të gjobiten.
Duke u thirrur në nenin 53.1 të Ligjit për parandalimin dhe luftimin e sëmundjeve ngjitëse, gjobat, sipas tij, do të jenë nga 1,000 deri në 2,000 euro për personat fizikë dhe nga 3,000 deri në 8,000 euro për personat juridikë.
"Sot kemi pranuar qarkoren informative nga niveli qendror, lidhur me gjobat për mosrespektim të urdhëresave dhe vendimeve në kuadër të masave për parandalimin e shpërndarjes së virusit", tha Ahmeti përmes një postimi në Facebook.
Ai i ftoi qytetarët që t’i zbatojnë masat, duke shtuar se "kohë për vërejtje, diskutim e mirëkuptim, nuk ka".
Qeveria tashmë në detyrë e Kosovës ka shpallur gjendje emergjente për shëndetin publik, pak kohë pas shfaqjes së rasteve të para me koronavirus, më 13 mars.
Në mesin e masave të ndërmarra, si mbyllja e shkollave dhe e restoranteve, është edhe ndalimi i lëvizjes së qytetarëve nga ora 17:00 deri në orën 06:00.
Në Kosovë, deri më tash janë konfirmuar 170 raste me koronavirus.
Prej tyre, katër kanë vdekur, 24 janë shëruar.
Nga radhët e komunitetit serb, janë infektuar 33 persona, ndërsa një ka vdekur.
Komuniteti serb i raporton rastet në Serbi.
Dhjetë për qind e të infektuarve në Maqedoninë e V. janë punonjës shëndetësorë
Në Maqedoninë e Veriut, 10 për qind e të infektuarve me koronavirus nga numri i përgjthshëm janë pjesë e stafit mjekësor.
“Kam përdorur maskë, dorëza dhe mjete dezinfektuese në çdo kohë, por, megjithatë, nuk iu shmanga infektimit nga virusi”, rrëfen për Radion Evropa e Lirë mjeku nga Dibra, Arben Agolli.
Ai ishte ndër të parët që u infektua nga koronavirusi, bashkë me tri infermiere dhe një mjek që ishin pjesë e stafit të ambulancës në këtë qytet.
Artikullin e plotë mund ta lexoni këtu.