Franca planifikon të zgjasë afatin e izolimit
Franca do të zgjasë izolimin në gjithë vendin, të vendosur për të ngadalësuar përhapjen e koronavirusit.
Izolimi "do të zgjatet" përtej 15 prillit, tha një zyrtar i presidencës, për agjencinë AFP.
Presidenti francez, Emmanuel Macron, pritet t'i drejtohet përsëri kombit javën tjetër, njoftoi Presidenca Franceze.
Ky pritet të jetë adresimi i tretë i Macronit dhe i pari nga Pallati Elysee, që prej fillimit të krizës.
Franca është në izolim që nga 17 marsit, për të ngadalësuar përhapjen e epidemisë.
Autoritetet lejojnë vetëm udhëtime thelbësore që duhet të justifikohen me një letër të nënshkruar.
Të mërkurën në Francë u raportuan 541 vdekje të tjera nga COVID-19 , duke e çuar numrin e përgjithshëm në 10,869.
Por, zyrtari i lartë francez i shëndetësisë Jerome Salomon u tha gazetarëve se tani kishte 7.114 persona në kujdes intensiv, një rritje prej 17 reste nga një ditë më parë.
Kjo shifër shënon rritjen më të ulët të regjistruar javët e fundit.
Putin u bën thirrje zyrtarëve rusë të përgatiten për të luftuar koronavirusin
Presidenti rus, Vladimir Putin, u ka thënë ministrave të kabinetit dhe krerëve rajonalë që të përgatiten për të luftuar koronavirusin.
"Tani për tani ne duhet të përgatitemi për të luftuar për jetën e secilit individ në çdo rajon", tha Putin.
Rusia ka më shumë se 8,670 raste të konfirmuara të të infektuarve, dhe të paktën 63 vdekje.
Sidoqoftë, kritikët kanë hedhur dyshime mbi vërtetësinë e shifrave, duke thënë se numri i numrave aktual mund të jetë shumë më i lartë.
Ndër masat që ka publikuar Putini, gjatë fjalimit të tij, ishte edhe pagesa shtesë për personelin mjekësor.
Për këtë janë planifikuar 133 milionë dollarë që do të shpërndahen në gjitha rajonet administrative.
Putini gjithashtu tha se e ka kuptuar sa e vështirë është të "mbetesh brenda katër mureve gjithë kohës".
"Por nuk ka zgjidhje", u tha ai shefave të rajoneve të Rusisë, të cilat janë kryesisht nën një bllokim të rreptë.
Izolimi në shtëpi, i vështirë për sportistët
Përhapja e koronavirusit në Kosovë ka ndryshuar përditshmërinë e secilit qytetar. Njëjtë ka ndodhur edhe me notaren nga Prishtina, Rita Zeqiri, e cila në vitin 2016 ka marrë pjesë në Lojërat Olimpike në Rio, Brazil.
Në komunat me shumicë serbe 36 të infektuar me koronavirus
Në komunat e banuara me shumicë serbe në Kosovë, janë konfirmuar edhe tri raste të reja të infektimit me koronavirus, duke e ngitur në 36 numrin e personave të infektuar.
Të dhënat i ka konfirmuar në një konferencë për media, epidemiologu Aleksandar Antonijeviq.
Deri më tash është raportuar një viktimë nga koronavirusi në komunat me shumicë serbe në Kosovë.
Komuniteti serb i raporton rastet në Serbi.
Ndërkaq në Kosovë, sipas të dhënave të prezantuara nga Instituti Kombëtar i Shëndetësisë Publike të Kosovës, deri më tani janë 184 raste të të infektuarve. Pesë persona kanë vdekur dhe 30 të tjerë janë shëruar.
Rastet e para me koronavirusin e ri në Kosovë u regjistruan më 13 mars.
Për shkak të pandemisë së koronavirusit, Qeveria e Kosovës ka shpallur gjendje emergjente të shëndetit publik.