Rritet numri i të prekurve nga koronavirusi në Kosovë
Instituti Kombëtar i Shëndetësisë Publike në Kosovë (IKSHPK) njofton se janë regjistruar edhe 14 raste të reja me sëmundjen COVID-19, që shkaktohet nga koronavirusi i ri.
Me rastet e reja të konfirmuara nga IKSHPK-ja, numri i përgjithshëm i të infektuarve me koronavirus në Kosovë arrin në 224, ndërsa numri i viktimave është gjashtë. Në njoftimin për media, ky institut ka përfshirë edhe rastet me COVID-19 edhe në komunat e banuara me shumicë serbe.
“Rastet pozitive të sotme janë raste kontakti, katër (4) prej tyre me vendbanim në Smrekonicë-Vushtrri, dy (2) me vendbanim në Banjë- Malishevë, dy (2) me vendbanim në Prishtinë, dy (2) me vendbanim në Mitrovicë të Veriut dhe me nga një (1) rast vendbanimet Bllacë-Suharekë, Gjurgjevik-Klinë, Krojmir-Lipjan dhe Zveçan”, thuhet në njoftim.
IKSHPK-ja po ashtu njofton se edhe shtatë pacientë janë shëruar, që e çon në 37 numrin e të shëruarve në Kosovë.
Nga radhët e komunitetit serb në Kosovë janë infektuar 36 persona, ndërsa një ka vdekur.
Komuniteti serb i raporton rastet në Serbi.
Rastet e para me koronavirusin e ri në Kosovë u regjistruan më 13 mars.
Për shkak të pandemisë së koronavirusit, Qeveria e Kosovës ka shpallur gjendje emergjente të shëndetit publik.
Djali i Vuçiqit, i infektuar me koronavirus
Danilo Vuçiq, i biri i presidentit të Serbisë, Aleksandar Vuçiq, është i infektuar me koronavirus, ka kumtuar vet presidenti serb Vuçiq, përmes një shkrimi në llogarinë e tij në Instagram.
“Kur gjithçka filloi, Danilo i im më tha që dorëzimi nuk është opsion. I linduri i im i parë, është i infektuar me koronavirus, ndërkaq paqyrën klinike e ka të tillë dhe është pranuar në Klinikën Infektive”, ka shkruar Vuçiq në Instagram.
Sipas të dhënave të fundit, nga koronavirusi në Serbi janë infektuar 2.666 njerëz, ndërsa 65 kanë vdekur.
Shkon në gjashtë numri i të vdekurve nga koronavirusi në Kosovë
Ministria e Shëndetësisë në Kosovë ka njoftuar se është konfirmuar edhe një vdekje nga koronavirusi në Kosovë.
Bëhet fjalë për një paciente, 66 vjeçare nga Malisheva e cila ka pasur edhe sëmundje tjera shoqëruese.
Italia raporton rënie të numrit të viktimave nga koronavirusi
Më 8 prill, Italia raportoi për 542 të vdekur nga koronavirusi. Ky është numri më i ulët i të vdekurve në një ditë, gjatë pothuajse një muaji. Autoritetet njoftuan se është hera e parë që numri i personave që janë larguar nga spitalet është mbi dy mijë brenda një dite.
Gjatë 24 orëve të fundit 3.836 njerëz u konfirmuan si të infektuar nga virusi në Itali, duke e çuar numrin e përgjithshëm të të infektuarve në 139.422.
Italia është vendi me numrin më të madh të vdekjeve nga viroza, me 17.669 vdekje.
Përmirësimi i situatës në Itali është rezultat i masave të marra dy ose tre javë më parë, tha zëdhënësi i Organizatës Botërore të Shëndetësisë, Ranieri Guera.