Gjermania përballet me rritje të re të numrit të të infektuarve
Numri i personave të infektuar me koronavirus në Gjermani, në 24 orët e fundit, është rritur për 5,323, duke e dërguar në 113,525 numrin total të të prekurve me këtë sëmundje.
Ky shtet ishte thënë të ketë parë një rënie të lehtë të numrit të të prekurve, megjithatë shifra e re ka shënuar ditën e katërt të rritjes së numrit të pacientëve të prekur me koronavirusin e ri.
Instituti për Sëmundje Infektive, Robert Koch ka njoftuar po ashtu se numri i të vdekurve ka arritur në 2,373.
Ky Institut në vazhdimësi raporton për shifra më të vogla në krahasim me ato të Universitetit Johns Hopkins.
Universiteti amerikan ka thënë se Gjermania ka 118,235 persona të infektuar dhe 2,607 të vdekur si pasojë e këtij virusi.
Vdekjet po shtohen, Suedia vazhdon me eksperimentin e masave anti-COVID-19
Suedia, për dallim nga pjesa tjetër e Evropës, po përballet me COVID-19, pa izolim të shkallës së gjerë.
Aty jeta po vazhdon në mënyrë pothujse normale.
Këtë fillim pranvere, pamjet nga Suedia duken ndyshe nga ato të shumicës së vendeve tjera. Në kafene dhe bare, kafeja po servohet dhe tapat e birrave dëgjohen tek hapen. Çdo mëngjes, fëmijet shkojnë në shkolla derisa palestrat dhe rrugët me dyqane përreth, nuk janë të zbrazura sikurse në vendet tjera të kontinentit.
Pse Suedia po i reziston trendit evropian kundër koronavirusit?
Hollësitë i kuptoni duke klikuar këtu.
BE-ja miraton paketën e shpëtimit
Ministrat e Financave në vendet e Bashkimit Evropian kanë arritur marrëveshje për paketën e shpëtimit në vlerë të 500 miliardë eurove, e cila synon t’iu ndihmojë vendeve evropiane të prekura më së keqi nga pandemia me koronavirus.
Udhëheqësi i Eurogrupit, Mário Centeno, ka njoftuar për arritjen e marrëveshjes, pas diskutimeve maratonike në Bruksel.
Ky vendim vjen pak pasi kryeministri spanjoll, Pedro Sanchez, ka thënë se ky shtet është afër kalimit të fazës më të vështirë të pandemisë.
Spanja aktualisht ka numrin më të madh të personave të prekur me sëmundjen Covid-19, që shkakton koronavirusi, 152,446, ndërkohë që më shumë se 15,000 kanë vdekur.
Kryeministri francez, Bruno Le Maire, ka përshëndetur marrëveshjen, duke e konsideruar si planin më të rëndësishëm në historinë e BE-së.
“Evropa ka vendosur dhe është e gatshme për t’u përballur me gravitetin e krizës”, ka thënë ai përmes një postimi në Twitter.
Udhëheqësja e Fondit Monetar Ndërkombëtar, Kristalina Georgieve ka paralajmëruar se bota përballet me krizën më të rëndë ekonomike prej periudhës së Depresionit të Madh, të viteve 1930.
Arrihet pajtueshmëri për ulje të prodhimit të naftës
Organizata e Vendeve Eksportuese të Naftës (OPEC), dhe vendet aleate janë pajtuar për të ndalur prodhimin e naftës për 10 për qind, me qëllim të luftimit të rënies së kërkesës pas izolimit të shkaktuar nga koronavirusi.
Ky grup ka thënë se në muajin maj dhe qershor do të zvogëlojë prodhimin për 10 milionë fuçi, për të ndihmuar në ngritje të çmimeve. Këto masa është thënë se do të lehtësohen në prill të vitit 2022.
OPEC Plus, që përbëhet nga vendet anëtare të OPEC-ut dhe aleatët, përfshirë Rusinë, kanë mbajtur të enjten video-konferencë për këtë çështje.
Bisedimet janë komplikuar si pasojë e mospajtimeve në mes të Rusisë dhe Arabisë Saudite.
Megjithatë ky grup është pajtuar për zvogëlimin e prodhimit ditor për 10 milionë fuçi. Ndërkohë pritet që kombet tjera të ndalin prodhimin e tyre ditor për 5 milionë fuçi.
Pas zhvillimit të një takimi në muajin mars, Arabia Saudite dhe Rusia patën rritur prodhimin e naftës, me qëllim të rikthimit të fitimeve në tregje, pas rënies së kërkesës në botë për këtë produkt.
Ky vendim, bashkë me zhvillimet e lidhura me koronavirusin e ri, kanë nxitur uljen e çmimit të naftës në nivelin më të ulët në 18 vjetët e fundit.
Së fundmi është parë përmirësim në çmime, sidomos pas deklaratës së presidentit amerikan, Donald Trump një javë më parë, i cili ka thënë se pret që Arabia Saudite dhe Rusia t’iu japin fund mospajtimeve.