Shefi i OKB-së: Covid-19 po kërcënon paqen dhe sigurinë globale
Sekretari i Përgjithshëm i Kombeve të Bashkuara, Antonio Guterres ka paralajmëruar Këshillin e Sigurimit se pandemia me koronavirus është duke kërcënuar paqen dhe sigurinë ndërkombëtare – “çka potencialisht mund të rezultojë me rritje të pakënaqësive shoqërore dhe dhunë, e cila mund të dëmtojë rëndë aftësinë tonë për ta luftuar virusin”.
Ai i ka bërë thirrje trupit më të fuqishëm të Organizatës, që ka qenë i heshtur për koronavirusin, prej kur ai ka filluar të qarkullojë në botë, që shtetet të bashkohen në luftë kundër tij, duke thënë se bashkëpunimi do të jetë “kritik për zbehjen e paqes dhe komplikimeve për sigurinë të nxitura nga sëmundja Covid-19”.
Guterres, i cili ka bërë thirrje për armëpushim për të gjitha konfliktet globale, ka thënë se kriza ka “penguar përpjekjet ndërkombëtare, rajonale dhe kombëtare për gjetjen e zgjidhjes për konflikte”.
Ai ka cituar edhe forma tjera që mund të shkaktojnë pasiguri globale, duke përfshirë mundësitë që mund të shohin militantët për të kryer sulme biologjike, mungesën e besimit në institucione publike, mungesën e stabilitetit ekonomik, tensionet politike nga shtyrja e zgjedhjeve, dhe sfidat që nxjerr në pah sëmundja Covid-19 në fushën e të drejtave të njeriut”.
Sekretari i Përgjithshëm ka përsëritur se Kombet e Bashkuara përballen me “testin më të madh” prej themelimit të organizatës 75 vjet me parë.
“Kjo është luftë e gjeneratës dhe e arsyes për vetë Kombet e Bashkuara”, ka shtuar mes tjerash ai.
Organizata Botërore e Shëndetësisë sjell disa këshilla se si duhet të kujdesemi në shtëpi për personat që dyshohen apo janë të prekur nga sëmundja COVID-19, që shkaktohet nga koronavirusi i ri.
Kujdesi në shtëpi për personat e prekur nga koronavirusi
Kosovë: Dy pacientë me koronavirus janë në gjendje kritike
Qendra Klinike Universitare e Kosovës ka bërë të ditur se dy pacientë të prekur me koronavirus vazhdojnë të jenë në gjendje kritike dhe po trajtohen me ventilim mekanik.
Përveç tyre, pesë pacientë janë në gjendje të rëndë me oksigjenoterapi.
Në Klinikën Infektive deri të premten janë hospitalizuar 44 pacientë, 40 të prekur me sëmundjen Covid-19, që shkakton koronavirusi derisa për katër të tjerë priten rezultatet.
Pacientët tjerë është thënë se janë në gjendje stabile.
Sipas të dhënave të fundit, në të gjitha komunat e Kosovës është raportuar për 227 persona të prekur me koronavirus, duke përshirë 38 persona të shëruar dhe shtatë të vdekur.
Rasti i parë me koronavirus në Jemen
Jemeni ka raportuar rastin e parë me koronavirus, në provincën lindore, Hadramout.
Grupet për ndihmë kanë paralajmëruar se përhapja e sëmundjes mund të ketë ndikim katastrofik në shtetin e shkatërruar nga lufta.
Të enjten është arritur pajtueshmëri për armëpushim dyjavor, të thirrur nga koalicioni që drejtojnë sauditët, të cilët luftojnë kundër rebelëve huthi në Jemen.
Konflikti pesëvjeçar ka shkatërruar Jemenin, pasi është raportuar për më shumë se 100,000 persona të vdekur.
Kjo luftë po ashtu ka nxitur atë që Kombet e Bashkuara e konsiderojnë si krizën më të rëndë humanitare.