Rreth 1 mijë vdekje të reja në Francë
Rreth 1 mijë persona kanë vdekur në Francë gjatë 24 orëve të fundit nga sëmundja COVID-19. Numri i përgjithshëm i vdekjeve ka arritur në 13,119.
"Duket se po e arrijmë majën e shpërthimit të epidemisë", tha zyrtari i lartë shëndetësor, Jerome Salomon.
Ministria e Shëndetësisë tha që 7,004 njerëz janë në kujdes intensiv.
Mbi 100,000 të vdekur nga koronavirusi në botë
Numri i të vdekurve nga koronavirusi në botë e ka kaluar shifrën 100,000.
Sipas Universitetit John Hopkins, të infektuar llogaritet të jenë 1.6 milionë njerëz. Numri i të shëruarve nga virusi ka arritur në 368,669
Koronavirusi i ri besohet të ketë origjinën nga një treg në Vuhan të Kinës, ku shiten kafshët e egra.
Rasti i parë u paraqit në Kinë, dhe virusi shpejt u përhap në mbarë botën.
Vdekja e parë ndodhi në qytetin kinez, Vuhan, më 9 janar. U deshën 83 ditë që të regjistroheshin 50,000 vdekjet e para, dhe vetëm tetë të tjera që numri i tyre të rritej në 100,000.
Numri është duke u përshpejtuar në një normë ditore midis 8% dhe 10%.
Përpilimi ditor që bën Universiteti Johns Hopkins për rastet globale me koronavirus është aktualisht më gjithëpërfshirësi në botë, por mbështetet në informacione që ofrojnë qeveritë.
Në shumë vende ka kufizime të informacioneve të tilla ose arsye përse nuk publikohet rrëfimi i plotë.
Metodologjia, shpejtësia, transparenca dhe cilësia e këtyre të dhënave mund të dallojë shumë nga vendi në vend.
Komuna e Prishtinës ka miratuar pakon ekonomike
Kryetari i Komunës së Prishtinës, Shpend Ahmeti, ka njoftuar se është miratuar pakoja ekonomike për të ndihmuar kryeqytetin në përballimin e pandemisë së koronavirusit.
Ndër masat që janë miratuar përfshihet edhe lirimi nga pagesa për çerdhet publike për të gjithë prindërit, blerja e pajisjeve shëndetësore, lirimi nga qiraja për bizneset që ushtrojnë veprimtarinë në pronën publike komunale etj.
Mbi 4 mijë të infektuar gjatë 24 orëve të fundit në Turqi
Në Turqi gjatë 24 orëve të fundit janë konfirmuar 4, 747 persona me koronavirus.
Numri i përgjithshëm i rasteve tani ka arritur në 47, 029.
Gjatë 24 orëve të fundit kanë vdekur 98 persona duke e rritur numrin e përgjithshëm të vdekjeve në 1,006, tha ministri i Shëndetësisë, Fahrettin Koca.