Në Shqipëri konfirmohen 17 raste të reja me koronavirus
Në Shqipëri gjatë 24 orëve të fundit janë testuar 259 persona prej të cilëve 17 kanë dalë pozitiv në sëmundjen COVID-19.
Kështu njoftoi zëvëndësministrja e Shëndetësisë së Shqipërisë, Mira Rakacolli.
Numri i përgjithshëm i të infektuarve ka arritur në 433.
Nga sëmundja deri më tani në Shqipëri kanë vdekur 23 persona.
Sa i përket numrit të të shëruarve, ministrja Rakacolli tha se gjatë 24 orëve të fundit janë regjistruar edhe 15 pacientë të shëruar, duke e çuar numrin e përgjithshëm të të shëruarve në 197.
Shkon në 831 numri i vdekjeve në Zvicër
Në Zvicër numri i vdekjeve nga koronavirusi i ri ka arritur në 831, tha të premten ministria e Shëndetësisë.
Numri i përgjithshëm i të infektuarve në këtë vend ka arritur në 24.900.
Më 8 prill autoritetet njoftuan po planifikojnë të lehtësojë masat që janë ndërmarrë për të luftuar përhapjen e koronavirusit.
Lehtësimi i masave, mund të bëhet duke filluar nga fundi i prillit.
"Ne e dimë se këto masa janë të vështira për ekonominë dhe njerëzit, por ne kemi planifikuar t'i lehtësojmë ato nga fundi i prillit", tha ministri i Shëndetësisë Alain Berset.
ASHNA: Një aeroplan bëri simbolin e zemrës në qiellin e Kosovës
Në hapësirën ajrore të Kosovës , aeroplani i kompanisë Chair në linjën Cyrih- Prishtinë, ka bërë simbolin e zemrës, si shenjë përkrahjeje për Kosovën, në kohën kur vendi po përballet me koronavirusin e ri, ka njoftuar Agjencia e Shërbimeve të Navigacionit Ajror të Kosovës (ASHNA).
“E jashtëzakonshme në Hapësirën Ajrore të Republikës së Kosovës! Sot më kërkesë të pilotit dhe me miratim të kontrollorit të trafikut ajror, aeroplani i kompanisë Chair në linjën Cyrih - Prishtinë bëri simbolin e zemrës në qiellin e Kosovës si shenjë përkrahjeje për vendin tonë në këto momente të vështira për gjithë në, si rrjedhojë e virusit COVID-19”, thuhet në njoftimin e Agjencisë.
Serbia e mban të fshehtë numrin e ushtarëve të infektuar me koronavirus
Ministri serb i Mbrojtjes, Aleksandar Vulin ka thënë se informacioni mbi numrin e ushtarëve serbë të sëmurë me COVID-19 nuk do të publikohet.
Ai i tha TV Happy se "99.9 përqind" e ushtarëve me COVID-19 kanë simptoma më të buta të sëmundjes dhe janë në karantinë.
Duke folur për situatën e pandemisë në Serbi, ai u ndal te çështja e migrantëve.
Vulin tha se asnjë migrant nuk është infektuar me koronavirus në qendrat e pritjes në Serbi, të cilat sigurohen nga ushtria.
"Më shumë se 8,000 migrantë në vendin tonë janë në 18 qendra pritjeje. Ata kanë gjithçka që u nevojitet, por nuk ka rrugëdalje. Ajo është një karantinë dhe ata duhet tëqëndrojnë brenda", tha Vulin.