Maqedonia e Veriut në izolim të plotë gjatë fundjavës
Në gjithë territorin e Maqedonisë së Veriut, prej të premtes në orën 16:00 ka nisur ora policore, e cila do të përfundojë të hënën në ora 05:00. Këto janë vetëm disa nga masat që kanë marrë autoritetet maqedonase për parandalimin e përhapjes së koronavirusit. Radio Evropa e Lirë ju sjell disa fotografi të bëra në Shkup.
Maqedonia e Veriut në izolim të plotë gjatë fundjavës
Mbretëria e Bashkuara regjistron 917 vdekje të reja
Autoritetet në Mbretërinë e Bashkuar kanë njoftuar të shtunën për 917 vdekje të reja nëpër spitalet e këtij shteti, si pasojë e koronavirusit të ri.
Kjo shifër e dërgon në 9,875 numrin e viktimave nga sëmundja Covid-19 në Britani.
Departamenti për Shëndet dhe Kujdes Shoqëror ka thënë se deri të shtunën janë regjistruar 78,991 persona të infektuar me këtë sëmundje.
Një ditë më parë, autoritetet kanë njoftuar për 980 vdekje nga ky virus. Ato po ashtu kanë rikujtuar se të dhënat janë vetëm për vdekjet që kanë ndodhur nëpër spitale.
Suedia “nuk ka bërë mjaftueshëm” në luftën kundër koronavirusit
Përgjatë pandemisë me koronavirus, përgjigjja e Suedisë ndaj sëmundjes Covid-19, që shkakton kjo sëmundje ka qenë e çuditshme.
Për dallim nga vendet tjera të Evropës, ky vend nuk ka marrë masa të izolimit, kafiteritë dhe restorantet janë të hapura dhe shkollat nuk janë mbyllur.
Ndonëse Qeveria suedeze ka këshilluar njerëzit që të shmangin udhëtimet jo të domosdoshme, banorët kanë vazhduar jetën e tyre.
Kryeministri i këtij shteti, Stefan Löfven e ka pranuar se Suedia nuk ka qenë e përgatitur për pandeminë dhe se “është e qartë që shteti nuk ka bërë mjaftueshëm”.
Ai i ka thënë transmetuesit suedez, SVT, se duhet mbyllur restorantet që nuk praktikojnë distancim fizik.
Në Suedi deri më tani, 870 persona kanë vdekur nga koronavirusi, disa herë më shumë në krahasim me vendet fqinje, si Danimarka që ka regjistruar 347 vdekje dhe Norvegjia 113, vende në të cilat veçse janë prezantuar masat e izolimit.
Arrin në 34 numri i viktimave nga koronavirusi në Maqedoni të Veriut
Dy të vdekur dhe 49 të infektuar është bilanci nga koronavirusi në 24 orët e fundit në Maqedoninë e Veriut. Ministri i Shëndetësisë Venko Filipçe, ka bërë të ditur se viktimat janë nga Kumanova dhe Prilepi, me çka numri i përgjithshëm i të vdekurve ka shkuar në 34.
Sipas raportit të publikuar, janë regjistruar edhe 49 raste të reja të të infektuarve me koronavirus duke e çuar numrin e të prekurve në 760. Numër më i madh është regjistruar në Kumanovë 14 dhe pastaj në Shkup 13.
Gjatë 24 orëve të fundit janë realizuar 586 teste, ndërsa numri i përgjithshëm i kontrolleve ka arritur në mbi 7,600.
Hollësitë tjera i gjeni këtu.