Në Kosovë 117 persona dyshohen për shkelje të masave anti-COVID-19
Policia e Kosovës ka njoftuar se në 117 persona dyshohen se nuk kanë respektuar masat për parandalimin e përhapjes së koronavirusit të ri.
Numri më i madh i personave që nuk kanë zbatuar vendimin e qeverisë janë në Prishtinë, 58 persona, pasuar nga Prizreni me 32 persona.
Duke marrë parasysh të dhënat e fundit, në gjithë Kosovën është raportuar për 283 persona të prekur nga sëmundja COVID-19, që shkakton koronavirusi, 58 janë shëruar derisa 7 të tjerë kanë vdekur.
Për shkak të koronavirusit të ri, Qeveria e Kosovës ka shpallur gjendje emergjente të shëndetit publik.
Nga një krizë virusi në një krizë ekonomike
Kosova është në krizë ekonomike, por pas pandemisë të shkaktuar nga virusi COVID-19, do të futet në një krizë edhe më të thellë, thonë ekspertë të fushës së ekonomisë.
Kosova e cila ka pasur një rritje ekonomike mesatarisht rreth 4 për qind ka qenë e pamjaftueshme për të zbutur papunësinë dhe problemet ekonomike dhe sociale.
Se pas pandemisë së koronavirusit, problemet do të përkeqësohen, e thonë edhe ekspertë, pasi që sipas parashikimeve edhe të Bankës Qendrore të Kosovë do të ketë një ulje të rritjes ekonomike nga -2 deri në -4 për qind. Ndërkaq, sipas Fondit Monetar Ndërkombëtar, pas pandemisë, ekonomia e Kosovës pritet të tkurret për 5 për qind.
Masat e marra deri më tani nga Qeveria e Kosovës për të ndihmuar ekonominë konsiderohen të pamjaftueshme dhe me vonesa në zbatimin e tyre.
Pse mendojnë ata kështu?
Materialin e plotë e gjeni këtu
Rritet numri i viktimave nga koronavirusi në Spanjë
Gjatë 24-orëve të fundit, në Spanjë është rritur numri i viktimave nga koronavirusi i ri, duke u shënuar 619 vdekje të reja.
Ky lajm vjen, pasi Spanja për tri ditë rresht shënoi rënie të numrit të vdekjeve nga sëmundja COVID-19, që shkaktohet nga koronavirusi i ri.
Sipas Ministrisë spanjolle të Shëndetësisë, numri i përgjithshëm i vdekjeve ka shkuar në 16,972, ndërkaq numri i përgjithshëm i të infektuarve ka arritur në 161,852.
Spanja është vendi i tretë në botë me numrin më të madh të viktimave nga koronavirusi, pas Shteteve të Bashkuara dhe Italisë.
Izraeli ashpërson masat në Jerusalem për shkak të COVID-19
Qeveria izraelite ka miratuar masa më të ashpra të karantinës në disa pjesë të Jerusalemit, përfshirë edhe pjesën historike të Qytetit të Vjetër, në përpjekje për të ndaluar përhapjen e mëtejmë të koronavirusit në këtë qytet.
Komiteti i ministrave miratoi ndalimin e qarkullimit në disa zona ultra-ortodokse të qytetit për ta ndaluar përhapjen e mëtejme të sëmundjes COVID-19, që shkaktohet nga koronavirusi, raporton AP.
Masat e ndërmarra hyjnë në fuqi mesditën e së dielës. Qytetarët nuk do të mund të lëvizin pa pasur leje të posaçme. Lëvizja do të lejohet vetëm për punë të domosdoshme dhe për kujdes shëndetësor.
Ministria e Shëndetësisë së Izraelit ka thënë se janë mbi 10 mijë raste me koronavirus, ndërsa mbi 100 pacientë kanë vdekur. Rreth një e pesta e rasteve janë në Jerusalem, ka thënë Ministria e Shëndetësisë.