Organizata Botërore e Shëndetësisë sjell disa këshilla:
Kujdesi në shtëpi për personat e prekur nga koronavirusi
Bie numri i viktimave nga koronavirusi në spitalet e Francës
Franca ka raportuar rënie të lehtë të numrit të të vdekurve nga koronavirusi në spitale dhe të pacientëve në kujdes intensiv.
Ky vend regjistroi 315 vdekje në spitale në 24 orët e fundit, krahasuar me 353 të shtunën.
Shifra e rrit në 14,393 numrin e viktimave nga koronavirusi në spitale.
Autoritetet raportuan edhe për rënie të numrit të pacientëve në kujdes intensiv, për të katërtën ditë me radhë.
Aktualisht, nën kujdes intensiv janë 6,845 persona.
Ministria e Shëndetësisë e Francës tha se lakorja e sëmundjes duket se është rrafshuar, por bëri thirrje për kujdes të vazhdueshëm.
“Duhet të mbetemi vigjilentë”, tha Ministria e Shëndetësisë.
Pas SHBA-së, Italisë dhe Spanjës, Franca ka numrin më të madh të viktimave nga koronavirusi në botë.
Pakistani kërkon t’i lehtësohen borxhet për të luftuar koronavirusin
Kryeministri i Pakistanit, Imran Khan, i bëri thirrje komunitetit ndërkombëtar që të lehtësojë urgjentisht borxhin për Pakistanin dhe vendet e tjera në zhvillim, në mënyrë që të ndihmohen ekonomitë e tyre, të goditura nga pandemia e koronavirusit.
Në një video-mesazh të publikuar nga Ministria e Jashtme e Pakistanit, Khan tha se “vendeve me borxhe të larta” u mungon “hapësira fiskale” për të shpenzuar në luftën kundër koronavirusit.
Ai tha se u bën thirrje udhëheqësve botërorë, krerëve të institucioneve financiare dhe sekretarit të përgjithshëm të Kombeve të Bashkuara që të bëhen bashkë dhe të ndërmarrin iniciativën për lehtësimin e borxheve për vendet në zhvillim.
Pakistani ka 5,232 të infektuar me koronavirus, ndërsa 91 pacientë atje kanë vdekur.
Pakistani u ka mbi 100 miliardë dollarë borxhe huadhënësve të huaj.
Spanja, larg fitores në luftën kundër koronavirusit, thotë kryeministri i saj
Spanja është "larg fitores" në luftën e saj kundër koronavirusit, paralajmëroi të dielën kryeministri spanjoll, Pedro Sanchez.
Komentet vijnë pasi numri i viktimave nga koronavirusi në Spanjë u rrit përsëri, pas tri ditësh rënie.
Ky vend regjistroi në 24 orët e fundit 619 viktima të reja, që e rritën në 16,972 numrin e përgjithshëm të tyre.
Shifra e viktimave ka qenë 510 të shtunën, më e ulëta qysh më 23 mars.
Spanja ka aktualisht 166,019 persona të infektuar me koronavirus dhe thuhet se numri i të infektuarve të rinj është në rënie.
Edhe pse autoritetet thonë se pandemia ka arritur kulmin, ato vazhdojnë t’i bëjnë thirrje popullatës që të respektojë izolimin, të vendosur qysh më 14 mars, për të frenuar përhapjen e koronavirusit.
“Jemi ende larg fitores, momentit kur do të rimëkëmbet normaliteti në jetën tonë”, tha kryeministri spanjoll, Sanchez, në një adresim televiziv.
"Ne të gjithë jemi të etur për të dalë në rrugë... por dëshira është edhe më e madhe për të fituar luftën dhe për të parandaluar rikthimin [e sëmundjes]", shtoi ai.
Spanja, pas Shteteve të Bashkuara dhe Italisë, ka numrin më të madh të viktimave nga koronavirusi në botë.
