BE e paralajmëron Hungarinë për ligjin për frenimin e koronavirusit
Presidentja e Komisionit Evropian, Urusula von der Leyen, e kërcënoi Hungarinë me procedime ligjore, për shkak të ligjeve të reja për frenimin e përhapjes së koronavirusit.
Von der Leyen i tha gazetës gjermane “Bild am Sonntag” se “është e gatshme të veprojë nëse kufizimet shkojnë përtej asaj që lejohet”.
Ditë më parë, Parlamenti i Hungarisë, i dominuar nga Partia Fidesz e kryeministrit Viktor Orban, i ka dhënë qeverisë autoritet të gjerë për trajtimin e krizës me koronavirus.
Ligji, i miratuar pa asnjë datë skadimi, i lejon Orbanit të qeverisë me dekret dhe, në disa raste, pa mbikëqyrje parlamentare.
Von der Leyen tha se vendosja e masave emergjente për luftimin e koronavirusit është e pranueshme, por shtoi se “masat duhet të jenë proporcionale, brenda një periudhe kohore të kufizuar dhe të kontrolluara në mënyrë demokratike".
Vendimet për mbrojtje nga COVID-19 "tash e tutje i merr Ministria e Shëndetësisë"
Vendimet për masat e reja në luftën kundër COVID-19 - sëmundjes që e shkakton koronavirusi - tash e tutje në Kosovë do të merren nga Ministria e Shëndetësisë, tha kryeministri në detyrë i Kosovës, Albin Kurti.
Njoftimi vjen një ditë para se të hyjë në fuqi vendimi i Gjykatës Kushtetuese të Kosovës, me të cilin është shpallur i pavlefshëm vendimi i 23 marsit, 2020, i Qeverisë së Kosovës për të kufizuar lëvizjen e lirë të qytetarëve, si masë për frenimin e koronavirusit.
“Koha nëpër të cilën jemi duke naviguar, nuk është aspak normale. E dini që vendimi i Gjykatës Kushtetuese na ka lënë kohë që deri nesër të shikojmë edhe një herë masën e marrë. Gjykata asnjëherë nuk e ka kontestuar vendimin në tërësi, por ka thënë se vendimi duhet të merret vetëm nga Ministria e Shëndetësisë dhe jo për të gjithë territorin e Kosovës. Prej sot, vendimet i merr Ministria e Shëndetësisë. Ato merren për komuna të caktuara me rekomandime që vijnë nga Instituti Kombëtar i Shëndetit Publik në Kosovë”, tha Kurti në një konferencë të përbashkët për media me ministrin në detyrë të Shëndetësisë, Arben Vitia.
Prishtina "e mbyllur"
Vitia tha të dielën se kufizimi i lëvizjes së lirë të qytetarëve do të vazhdojë në të gjitha komunat e Kosovës.
Kjo masë është e njëjtë me vendimin e 23 marsit, që ndalonte qarkullimin e lirë të njerëzve dhe automjeteve nga ora 17:00 deri në ora 06:00.
Por, tani, ky është vendim i Ministrisë në detyrë të Shëndetësisë.
“Prej sonte në secilën komunë hyjnë në fuqi masat për ndalim-qarkullim, ato që kanë qenë deri sot. Ju njoftoj se këto masa që do t’i vazhdojmë, do të jenë në fuqi deri në vendimin e radhës. Instituti i Shëndetësisë Publike ka dërguar edhe disa rekomandime për masa shtesë. Këto masa do të bëhen publike në ditët në vazhdim”, tha Vitia, duke iu bërë thirrje qytetarëve të Kosovës që të bashkëpunojnë për ta mbrojtur shëndetin publik.
Në Kosovë aktualisht janë të infektuar 283 persona me koronavirus. Deri më tani, 58 janë shëruar dhe shtatë kanë vdekur.
Ventilatorë ‘Made in Kosova’
Kompania kosovare “Formon” që kryesisht krijon printerë 3D, ka krijuar një prototip të ventilatorit që besohet se do të ndihmojë të prekurit nga koronavirusi.
Italia me numrin më të ulët të viktimave në më shumë se tri javë
Italia ka raportuar për 431 vdekje nga koronavirusi në 24 orët e fundit – çfarë është numri më i ulët në më shumë se tri javë.
Sipas autoriteteve shëndetësore, shifra e së dielës është më e ulëta qysh më 19 mars, kur janë regjistruar 427 vdekje të lidhura me koronavirus.
Numri i njerëzve në kujdes intensiv në këtë vend ka vazhduar po ashtu të bie, me 38 raste më pak se ditën paraprake.
“Të dhënat tregojnë se masat (e izolimit) janë duke pasur ndikim”, tha profesori Luca Richeldi, këshilltar për shkencë i Qeverisë italiane.
Në total, Italia ka 19,899 të vdekur nga koronavirusi dhe 156,363 të infektuar.
Italia është vendi më i goditur në Evropë nga kjo sëmundje.
Të shtunën, Shtetet e Bashkuara e kanë kaluar atë për nga numri i viktimave, pasi kanë regjistruar mbi 20,000.
Rajoni më i prekur i Italisë është Lombardia, e cila është izoluar qysh më 8 mars.
