Miratohet marrëveshja për zvogëlim të prodhimit të naftës
Organizata e Vendeve Eksportuese të Naftës (OPEC), Rusia dhe shtetet tjera prodhuese kanë finalizuar një marrëveshje për ulje të pashembullt të prodhimit të naftës, me shpresën e rritjes së çmimeve globale, që kanë rënë për shkak të pandemisë me koronavirus dhe luftës me çmime.
OPEC Plus, një grup prej 23 vendeve anëtare prodhuese, që përfshin edhe Rusinë, kanë thënë se janë pajtuar për të zvogëluar sasinë e naftës së prodhuar për 9.7 fuçi në ditë gjatë muajve maj dhe qershor.
Kjo marrëveshje po ashtu u kërkon anëtarëve të këtij grupi që të ulin prodhimin e naftës nga niveli aktual, në 6 milionë fuçi në ditë deri në prill të vitit 2022.
“Marrëveshja e Madhe për naftë me OPEC-Plusin është arritur”, ka thënë presidenti amerikan, Donald Trump.
“Sapo bisedova me ata. Marrëveshje e mrekullueshme për të gjithë”.
Duke deklaruar se marrëveshja “do të ruajë qindra mijëra vende të punës të lidhura me energjinë në Shtetet e Bashkuara” Trump ka përgëzuar dhe falënderuar presidentin rus, Vladimir Putin dhe Mbretin Salman të Arabisë Saudite.
Kremlini ka njofuar të hënën se Putin ka biseduar përmes telefonit me Trumpin dhe Mbretin Salman, dhe që të tre liderët kanë treguar përkrahje për marrëveshjen.
Kremlini ka thënë se Putin ka folur edhe ndaras vetëm me Trumpin për të diskutuar tregun e naftës dhe çështje tjera.
Sipas një draft-deklarate të Grupit OPEC-Plus, të parë nga agjencia e lajmeve, Reuters, ky grup pret që prodhimi global i naftës të ulet për 20 milionë fuçi brenda ditës, apo 20 për qind e furnizimeve globale, duke nisur nga 1 maji.
Duket se si rezultat i marrëveshjes, çmimet e naftës janë rritur për 3 për qind në tregjet aziatike ditën e hënë.
Mirëpo analistë të tregjeve presin që marrëveshja nuk do të zbatohet gjatë, duke thënë se ky pakt nuk u ka dhënë investitorëve shpresë afatgjatë, në kohën e pandemisë me koronavirus.
Më shumë se gjysma e të infektuarve në Gjermani janë shëruar
Gjermania tani ka më shumë njerëz të shëruar nga koronavirusi sesa raste aktive, kanë thënë zyrtarët.
Në 24 orët e fundit, janë regjistruar 2,537 raste pozitive, duke e rritur në 127,854 numrin total të të prekurve nga sëmundja Covid-19, që shkakton koronavirusi.
Kjo është shifra e katërt më e madhe e të infektuarve në Evropë, mirëpo mbi 50 për qind e tyre janë shëruar.
Në Spanjë 37 për qind e 166,831 personave të infektuar janë shëruar, në Itali 22 për qind e 156,363 të prekurve dhe në Francë 21 për qind e 133,670 personave të sëmurë.
Në Mbretërinë e Bashkuar, 85,208 persona kanë rezultuar pozitivë, mirëpo vetëm 0.3 për qind janë shëruar.
Gjermania ka edhe shkallën më të ulët të mortalitetit, e cila i është atribuuar numrit të madh të testimeve, pasi në mesin e të infektuarve ka pacientë me simptoma të lehta.
Kancelarja gjermane, Angela Merkel dhe zyrtarë të lartë shtetërorë do të takohen të hënën për të diskutuar mundësitë e lirimit të masave të izolimit.
Performanca e Bocellit shikohet miliona herë
Tenori italian, Andrea Bocelli ka mbajtur një koncert për Festën e Pashkëve në Katedralen e zbrazët të Milanos të dielën, derisa miliona persona e kanë ndjekur atë në kohë reale përmes platformave online, ndërkohë që kanë qëndruar të izoluar në shtëpi për shkak të koronavirusit.
Performanca e tij në katedralen Duomo, që është transmetuar drejtpërdrejt në kanalin e tij në YouTube, është shikuar më shumë se 23 milionë herë deri më tani.
“Falë muzikës, ne do të bashkojmë miliona duar në gjithë botën, do të përqafojmë këtë puls të plagosur të Tokës”, ka thënë Bocelli, një nga tenorët më të famshëm në botë.
Italia është vendi i prekur më së keqi nga koronavirusi në Evropë, me gati 20,000 të vdekur deri më tani, duke përfshirë mbi 9,000 vdekje në rajonin e Lombardisë, që ka për kryeqendër Milanon.
Ish-ministri Ismaili kritikon strategjinë e testimeve për koronavirus
Ish-ministri i Shëndetësisë, Uran Ismaili, ka kritikuar Qeverinë në detyrë të Kosovës për menaxhimin e situatës pas rritjes së numrit të të infektuarave me koronvirusin e ri.
Ismaili që është nënkryetar i Partisë Demokratike të Kosovës, ka thënë se do të duhej që të aplikohej një strategji e testimeve agresive për të ndalur sa më shpejt zinxhirin e infektimeve.
“Kosova ka numrin më të ulët të testimeve për kokë banori në rajon dhe është shumë larg modeleve të suksesshme të luftës kundër Covid-19. Ku mbeten 7000 testet që erdhën në Kosovë? Ku mbeten testet nga Turqia? Dhe, më e rëndësishmja, kur do të mbërrijmë në 1000 teste në ditë?”, ka shkruar Ismaili në Faccebook.
Ai ka thënë se testimet janë politikë ekskluzive e qeverisë në detyrë dhe se kjo është përgjegjësi direkte e kryeministrit në detyrë Albin Kurti dhe ministrit në detyrë të Shëndetësisë, Arben Vitia.
Kohë më parë, Ministria në detyrë e Shëndetësisë, ka njoftuar se ka bërë kërkesë për furnizim me 10,000 teste të tjera, pasi Kosova nuk mund t’i prodhojë vetë ato, rrjedhimisht varet krejtësisht nga importi.
Aktualisht në gjithë territorin e Kosovës me këtë sëmundje janë infektuar 362 persona, 59 janë shëruar derisa shtatë kanë vdekur.
Me qëllim të luftimit të virusit, autoritetet kanë shpallur gjendje emergjente për shëndetin publik.