Hapet rast penal për organizatorët e një ndenje në Vushtrri
Policia e Kosovës ka hapur rast penal ndaj dy qytetarëve nga Vushtrria të cilët kanë shkelur masat e vendosura nga autoritetet, duke organizuar ndejë me muzikë në ambiente private.
Zëdhënësi i Policisë së Kosovës për rajonin e Mitrovicës, Avni Zahiti, ka konfirmuar për Radion Evropa e Lirë se deri te identifikimi i rastit ka ardhur pasi të dyshuarit kishin publikuar fotografi në rrjete sociale.
“Janë identifikuar në bazë të disa fotografive që i kanë postuar në rrjete sociale. Janë identifikuar nga polica, janë shoqëruar apo janë arrestuar, janë intervistuar dhe janë liruar. Ndaj tyre është iniciuar rast për mosrespektim të dispozitave ligjore”, tha Zahiti.
Pos këtyre dy personave të arrestuar, policia nuk ka dhënë detaje të tjera për numrin e të pranishmëve në këtë organizim ku bëhej muzikë folklorike me shairë.
Aktualisht në gjithë territorin e Kosovës me këtë sëmundje janë infektuar 362 persona, 59 janë shëruar derisa shtatë kanë vdekur.
Me qëllim të luftimit të virusit, autoritetet kanë shpallur gjendje emergjente për shëndetin publik.
Kosovë: 102 persona shkelin masat kundër koronavirusit
Policia e Kosovës ka ndalur 102 persona në 24 orët e fundit për shkak të mosrespektimit të masave të kufizimit, me qëllim të luftimit të koronavirusit të ri.
Numri më i madh i qytetarëve që nuk kanë respektuar masat është nga qyteti i Prishtinës, 47 persona.
Prishtina është futur të dielën në karantinë pasi Instituti Kombëtar i Shëndetësisë Publike ka njoftuar për shtim të numrit të rasteve me sëmundjen Covid-19, që shkakton koronavirusi.
Përveç Prishtinës, në karantinë janë futur edhe Prizreni, Ferizaj dhe Suhareka.
Prej shpërthimit të këtij virusi në Kosovë më 13 mars, të dielën është regjistruar numri më i madh i të prekurve brenda një dite, 79.
Aktualisht në gjithë territorin e Kosovës me këtë sëmundje janë infektuar 362 persona, 59 janë shëruar derisa shtatë kanë vdekur.
Me qëllim të luftimit të virusit, autoritetet kanë shpallur gjendje emergjente për shëndetin publik.
Komunitetet RAE në Kosovë, të pambrojtura përballë COVID-19
Asnjë person nga komunitetet rom, ashkali dhe egjiptas (RAE) nuk është prekur në Kosovë nga koronavirusi i ri, mirëpo deri tash nuk ka pasur asnjë test të bërë në këto komunitete, kanë thënë zyrtarë që merren me mbrojtjen dhe monitorimin e këtyre pakicave.
Bekim Syla, nga Qendra Dokumentuese për Rom, Ashkali dhe Egjiptas, tha se organizata e tij vazhdimisht është duke punuar në terren dhe se deri tash nuk ka rezultuar asnjë person i prekur me COVID-19 nga këto minoritete.
“Për fat të mirë asnjë në Kosovë nuk është i prekur me koronavirus. Por, me sa kam informata, asnjë test nuk ju është bërë këtyre komuniteteve. Por nuk kanë as shenja asnjëri prej tyre”, tha Syla.
Kuptoni më shumë duke klikuar këtu.
Banka Botërore paralajmëron Azinë Jugore për rënie të thellë ekonomike
Azia Jugore përballet me performancën më të keqe ekonomike në 40 vjet për shkak të koronavirusit, ka thënë Banka Botërore.
Efektet e këtij virusi do të ndikojnë për dekada në përparimin e këtij rajoni në luftën kundër varfërisë.
Ekonomitë si India, Bangladeshi, Shri Lanka dhe Pakistani kanë raportuar relativisht pak raste të prekura, mirëpo ekspertët shqetësohen se këto hapësira mund të jenë qendrat e reja të përhapjes së sëmundjes Covid-19, që shkakton koronavirusi.
Azia Jugore ka rreth 1.8 miliard banorë dhe ka disa prej qyteteve me popullsinë më të dendur.
“Azia Jugore e gjen veten në stuhinë perfekte të efekteve të dëmshme. Turizmi ka rënë, zinxhirët e furnizimeve janë dëmtuar, kërkesat për veshje janë ndalur dhe investimet janë çorientuar”, ka thënë Banka Botërore.
Kjo Bankë ka ulur parashikimet për rritje ekonomike në këtë rajon, nga 6.3 për qind në 1.8 deri në 2.8 për qind. Ajo po ashtu ka thënë se gjysma e shteteve në këtë rajon do të përballen me “recesion të thellë”.
Ekonomia e Maldiveve do të goditet më së keqi, ka paralajmëruar Banka, duke përmendur arsyet e shkatërrimit të turizmit për një periudhë.
India, ekonomia më e madhe në Azinë Jugore, mund të ketë rritje ekonomike prej 1.5 për qind nga 5 për qind sa ishin planet fillestare.