Mjeku kosovar ndihmon të infektuarit në Shqipëri
Qemajl Aliu, mjek nga Shtimja ka 18 vjet që jeton në Tiranë. Ai tani është duke ndihmuar pacientët e infektuar me COVID-19 në Shqipëri.
Mbi 4 mijë të vdekur nga koronavirusi në Belgjikë
Belgjika ka raportuar për 262 vdekje të reja nga koronavirusi i ri, duke e rritur numrin e viktimave në këtë vend në 4,157.
Belgjika rradhitet vendi i pestë në Evropë për nga numri i viktimave.
Sipas Qendrës Evropiane për Parandalimin dhe Kontrollin e Sëmundjeve, numri i vdekjeve në Belgjikë është pas Italisë, Spanjës, Francës dhe Mbretërisë së Bashkuar.
Transmetuesi televiziv kombëtar RTBF ka raportuar se masa e izolimit të vendit ka të ngjarë të zgjatet deri më 3 maj.
Këshilli i Sigurisë Kombëtare do të mbajë një takim të mërkurën, për të diskutuar se kur do ta përfundojë atë.
Gjatë 24 orëve të fundit janë konfirmuar 530 raste të reja duke e çuar numrin e përgjithshëm të të infektuarve në 31,119.
Nga këto, 20.094 janë klasifikuar si raste "aktive" dhe 1,223 persona aktualisht janë në kujdesin intensiv.
Pesë zyrtarë të Policisë së Kosovës janë konfirmuar me koronavirus
Që nga shfaqja e rastit të parë me koronavirus në Kosovë e deri tani, pesë zyrtarë policorë janë infektuar me koronavirus.
Policia e Kosovës ka konfirmuar për Radion Evropa e Lirë se që të pesë zyrtarët policorë janë në vetizolim.
“Një rast në Malishevë, zyrtari ka qenë i liruar nga puna, në pushim si rast i veçantë shëndetësor dhe i njëjti nuk ka pasur kontakt me ndonjë zyrtar policor, gjendet ne vetëkarantinë. Një rast në rajonin e Prishtinës vizitë studimore në Londër, dhe falë syçëltësisë dhe komunikimit me Drejtorinë e Shërbimeve Shëndetësore të Policisë, menjëherë është vendosur në vetëkarantinë duke mos rrezikuar aspak të tjerët. Tri raste në Veri të Mitrovicës, zyrtarët janë duke u monitoruar dhe gjenden në karantinë”, thuhet në përgjigjen e Policisë së Kosovës, dhënë për Radion Evropa e Lirë.
Policia e Kosovës thotë se ka marrë të gjitha masat për të ruajtur zyrtarët policorë nga infektimi me koronavirus.
“Policia e Kosovës me qëllim të mbrojtjes të të gjithë zyrtarëve policorë dhe në veçanti zyrtarëve në pikat kufitare, në lidhje me situatën rreth koronavirusit ka ndërmarrë masat të menjëhershme përmes aktiviteteve nga Drejtoria e Shërbimeve Shëndetësore e Policisë, siç janë: dezinfektimi, dezinsektimi dhe deratizimi në të gjitha pikat kufitare, stacionet dhe objektet policore, proces i cili është në vazhdim”, thuhet në përgjigjen e Policisë së Kosovës.
Sa i takon implementimit të masave të reja, të bëra publike nga Ministri i Shëndetësisë, Arben Vitia, për kufizim të lëvizjes se qytetarëve në vetëm një orë e gjysmë brenda ditës, Policia e Kosovës thotë se që nga fillimi ka përgatitur plan operativ për zbatimin e çdo vendimi të institucioneve.
Policia thotë se po vazhdon punën e saj me orare të zgjatura duke angazhuar personel te mjaftueshëm me qëllim te realizimit te detyrave dhe përgjegjësive te saja ligjore.
Video nga arkivi:
Bosnja tregon shifrat e të infektuarve dhe vdekjeve nga koronavirusi i ri
Në Bosnje dhe Hercegovinë janë konfirmuar si të infektuar me koronavirusin e ri gjithsej 1,083 persona.
Autoritetet thanë se numri i personave të vdekur nga sëmundja është 40.
Sipas ministrisë për Çështje Civile të Bosnjës, deri më tani janë shëruar 236 persona të cilët ishin të infektuar me koronavirusin e ri.
Gjithsej 14.111 persona janë nën mbikëqyrje.