FMN: Bota po përballet me recesionin më të keq që nga Depresioni i Madh
Ekonomia globale do të tkurret me 3% këtë vit për shkak të efekteve të pandemisë, tha Fondi Monetar Ndërkombëtar.
FMN e përshkroi rënien e ekonomisë globale, si më të keqën që nga Depresioni i Madh i viteve 1930.
Sipas FMN-së pandemia e ka zhytur botën në një "krizë si asnjë tjetër".
Fondi shtoi se nëse kjo situatë do të zgjasë, atëherë do të vihet në test aftësia e qeverive dhe bankave qendrore për të kontrolluar krizën.
Gita Gopinath, kryesuesja e ekonomistëve të FMN-së tha se kriza mund t'i kushtojë ekonomisë botërore 9 trilionë gjatë dy viteve të ardhshme.
Ajo tha se rritja e ekonomisë globale mund t'i rikthehet shifrës 5.8% gjatë vitit 2021, por kjo mund të ndodhë vetëm nëse pandemia përfundon gjatë gjysmës së dytë të vitit 2020.
Vendet e G7-ës diskutojnë për masat ndaj efekteve ekonomike të pandemisë
Drejtuesit e financave të G7-ës, apo grupit të vendeve më të industrializuara, ranë dakord të martën mbi nevojën për të ofruar ndihmë financiare dhe teknike për ekonomitë në zhvillim, që luftojnë me pasojat nga pandemia e koronavirusit, tha ministri japonez i Financave, Taro Aso.
Drejtuesit e financave të G7 diskutuan nevojën për një përgjigje të koordinuar mes tyre, për të trajtuar dëmet që kriza shëndetësore po i shkaktonte ekonomisë globale, u tha Aso gazetarëve.
"Nuk ka dyshim se ekonomia globale do të vijë nën presion nga pandemia e koronavirusit", tha ai.
Ministrat e finanacave të vendeve anëtare të G7-ës mbajtën një konferencë online.
Më 20 mars Presidenti i Shteteve të Bashkuara, Donald Trump, anuloi samitin e G7-ës, për shkak të krizës me koronavirus.
Ishte paraparë që samiti të mbahej në qershor, në Kamp Dejvid, pranë Uashingtonit.
G7-ta përbëhet nga: Britania, Kanadaja, Franca, Gjermania, Italia, Japonia dhe Shtetet e Bashkuara.
Të gjitha këto shtete po luftojnë për frenimin e pandemisë.
SHBA-ja mban udhëheqjen e G7-ës gjatë vitit 2020.
Testimet për COVID-19
Qendra Evropiane për Parandalimin dhe Kontrollin e Sëmundjeve (ECDC) ka dhënë disa udhëzime se kush duhet të testohet për COVID-19.
Këshillat aktuale për testimin varen nga faza e shpërthimit në vendin ose zonën ku banoni.
Qasjet në testim përshtaten me situatën në nivel kombëtar dhe lokal.
Autoritetet kombëtare mund të vendosin të testojnë vetëm nëngrupe të njerzve nga rastet e dyshuara bazuar në pakacitetet kombëtare për testim, pastaj varësisht nga posedimi i pajisjeve të nevojshme për testim, nivelin e transmetimit brenda komunitetit ose kritereve të tjera.
ECDC ka sugjeruar që autoritetet kombëtare mund të konsiderojnë prioritetet e testimit në grupet e mëposhtme:
- pacientët e shtruar në spital me infeksione të rënda të frymëmarrjes;
- stafi i kujdesit shëndetësor që është simptomatik përfshirë ata me simptoma të buta;
- rastet me infeksione akute të frymëmarrjes në spital ose institucione të kujdesit afatgjatë;
- pacientët me infeksione akute të frymëmarrjes ose sëmundje të ngjashme me gripin;
- personat e moshuar me sëmundje kronike si sëmundjet e mushkërive, kancer, sëmundjet e zemrës, sëmundje të mëlçisë, diabet dhe sëmundje tjera të sistemit imunitar.
Kroacia me 54 raste të reja me koronavirus
Në Kroaci gjatë 24 orëve të fundit janë konfirmuar 54 raste të reja me koronavirusin e ri.
Ministri i Shëndetësisë së Kroacisë, Vili Berosh tha se numri i përgjithshëm i të infektuarve ka arritur në 1,704.
Ai njoftoi se janë testuar gjithsej 18,359 persona.
Numri i përgjithshëm i vdekjeve në këtë vend anëtar të Bashkimit Evropian, ka arritur në 31, ndërkaq numri i personave të shëruar ka shkuar në 415.