Ambasada amerikane kërkon respektimin e masave kundër koronavirusit
Ambasada e Shteteve të Bashkuara në Prishtinë ka kërkuar respektimin e masave të vendosura nga autoritetet e Kosovës për të parandaluar përhapjen e koronavirusit.
Përmes një postimi në rrjetet sociale, Ambasada amerikane tha se respektimi i masave ndihmon në luftimin efikas të koronavirusit.
“Ne e dimë që distanca sociale globale dhe ndjekja e kufizimeve lokale të lëvizjes po vjetërsohen. Por, është shumë e rëndësishme që ne të vazhdojmë t'i ndjekim udhëzimet e nxjerra nga Qeveria e Kosovës dhe komunat, për të ndaluar përhapjen e COVID-19 [sëmundjes që e shkakton koronavirusi]. Ne do të jemi në gjendje ta shohim njëri-tjetrin personalisht nëse ndiqen këto masa. Ne jemi bashkë në këtë dhe së bashku mund ta mposhtim COVID-19”, shkroi Ambasada amerikane në profilin e saj në Facebook.
Kosova ka vendosur masa të reja të qarkullimit, nisur nga sot.
Sipas tyre, qytetarët mund të dalin nga shtëpitë vetëm për 90 minuta në ditë, me qëllim furnizimi.
Orari i daljes është i organizuar në shtatë grupe, nga ora 07:00 deri në 22:30, dhe varet nga numri i parafundit personal në letërnjoftim.
Në Kosovë aktualisht janë të konfirmuara 387 raste të të infektuarve me koronavirus; nëntë pacientë kanë vdekur, ndërsa 69 janë shëruar.
Kufizim i të drejtave të njeriut, në emër të shpëtimit të jetëve
Masat e reja që Qeveria në detyrë e Kosovës i ka vendosur për parandalimin e përhapjes dhe shpërndarjes së koronavirusit janë vënë në qendër të vëmendjes dhe debateve, për shkak të implikimeve nga aspekti i të drejtave të njeriut.
Këto masa kufizojnë lirinë e lëvizjes për qytetarët vetëm në një orë e gjysmë gjatë një dite, përderisa personat nën moshën 16-vjeçare dhe ata mbi 65 vjeç duhet të qëndrojnë brenda, përveç rasteve të domosdoshme apo urgjente.
Nga Këshilli për Mbrojtjen e Lirive dhe të Drejtave të Njeriut, me seli në Prishtinë, këto masa shihen nga dy perspektiva.
Për më tepër mund të lexoni këtu.
Rritet për më shumë se 5,000 numri i të infektuarve në Spanjë
Numri i të infektuare me koronavirus në Spanjë është rritur për 5,100 në 24 orët e fundit, duke arritur në 177,633.
Kjo është rritja më e madhe e kësaj shifre në pesë ditët e fundit në Spanjë.
Megjithatë, numri i viktimave ditore në këtë vend ka rënë lehtë në 24-orëshin paraprak, kur janë regjistruar 523.
Mbi 8,500 njerëz kanë vdekur deri më tash nga koronavirusi në Spanjë.
Kryeministri spanjoll, Pedro Sanchez, u tha ligjvënësve të mërkurën se asgjë nuk do të jetë më njësoj, derisa nuk gjendet vaksina.
Këtë javë, Spanja ka nisur lehtësimin e disa masave të izolimit, duke u lejuar fabrikave dhe kompanive të ndërtimit të rinisin operimet.
Kontrollimi i fakteve gjatë një pandemie
Pandemia e koronavirusit dhe rritja e shpejtë e kërkesave për informacion kanë krijuar një ambient ideal për përhapjen e keqinformacioneve dhe dezinformacioneve në gjithë botën.
Nga aktorët keqdashës dhe politikanët që përpiqen t’i avancojnë interesat e tyre deri te përdoruesit e dyshimitë të mediave sociale, pandemia ka krijuar një stuhi të përsosur që mundëson përhapjen e informacioneve të manipuluara me shpejtësi të paparë.
Derisa numri i përdoruesve të mediave sociale vazhdon të rritet në të gjithë botën, audienca duket se preferon organizatat kryesore të lajmeve si burim kryesor të informacionit.
Kjo vë përgjegjësi shtesë mbi organizatat e lajmeve, sepse, përveç sigurimit të informacionit në kohë dhe të saktë për publikun, ato gjithashtu duhet t’i korrigjojnë dhe hedhin poshtë manipulimet e qëllimshme ose të paqëllimshme me informacione.
Këtu mund të lexoni disa nga praktikat më të mira për kontrollimin e fakteve, të vlerësuara nga shkencëtarët socialë, reporterët, qendrat kërkimore dhe organizatat joqeveritare.