Nju Jorku shtyn masat e izolimit deri më 15 maj
Masat e izolimit në Nju Jork do të zgjasin deri më 15 maj, tha guvernatori, Ndrew Cuomo.
Ai tha se ekspertët do të jenë ata që do të përcaktojnë se kur shteti mund t'i heq masat kundër pandemisë.
Ai tha se vendimi nuk do të ishte "politik" ose "emocional".
Numri i përgjithshëm i të infektuarve në Shtetet e Bashkuara, ka arritur në 640,291.
Deri më tani janë shënuar 139,469, të vdekur.
Mbretëria e Bashkuar e shtyn periudhën e izolimit
Mbretëria e Bashkuar e ka shtyrë periudhën e izolimit edhe për të paktën tre javët e ardhme. Kështu njoftoi sekretari Jashtëm britanik, Dominic Raab.
Ai tha se ka pasur sinjale se masat e distancës fizike në vend po tregojnë sukses. "Ende nuk e kemi nivelin e të infektuarve aq ulët sa duhet", tha ai
"Çdo ndryshim në masat e distancës fizike tani do të rrezikonte një rritje të konsiderueshme të numrit të të infektuarve. Prandaj si rezultat, qeveria do t'i mbajë në fuqi masat aktuale për tre javë të tjera" shtoi ministri britanik.
Sipas të dhënave të Universitetit John Hopkins në SHBA, në Mbretërinë e Bashkuar janë 104,133 raste të të infektuarve, ndërsa 13,755 kanë vdekur.
Edhe një viktimë nga koronavirusi në Kosovë
Në Kosovë është shënuar edhe viktima e 11-të nga koronavirusi i ri. Klinika Infektive ka njoftuar se më 16 prill 2020, në orët e pasdites në Njësinë e Kujdesit Intensiv të kësaj klinike ka përfunduar me vdekje pacientja F.H. (1949) nga Komuna e Vushtrrisë.
"Pacientja është hospitalizuar në Klinikën Infektive me datë 05.04.2020, e referuar nga Qendra Emergjente e Spitalit të Vushtrrisë. Pacientja ka qenë në gjendje të rëndë që nga pranimi në Klinikën Infektive, testi për SARS-CoV- 2 ka rezultuar pozitiv dhe përveç sëmundjes COVID-19 ka pasur edhe sëmundje të tjera shoqëruese", thuhet në njoftim.
Kjo është vdekja e dytë brenda ditës së enjte në Kosovës.
Më herët u njoftua se një grua 73-vjeçare nga Peja ka ndërruar jetë në Klinikën Infektive në Prishtinë. Ajo ishte diagnostikuar me koronavirus dhe ishte duke u trajtuar nga data 25 mars në këtë Klinikë.
Deri më tani Kosova ka 423 raste të konfirmuara me koronavirus; ndërsa 74 janë shëruar.
