Tre gjinekologë dhe një mami të infektuar me koronavirus në Kosovë
Tre gjinekologë dhe një mami që punojnë në Klinikën e Gjinekologjisë në Qendrën Klinike Universitare të Kosovës kanë rezultuar pozitivë në testin për koronavirus.
Lajmin e ka konfirmuar për Radion Evropa e Lirë drejtori i Klinikës Gjinekologjike, Jakup Ismajli.
“Po, tre gjinekologë dhe një mami kanë dalë pozitivë në testin për koronavirus. Ata janë infektuar në vendin e tyre të punës”, ka thënë Ismajli për Radion Evropa e Lirë.
Edhe më herët është raportuar për disa raste të mjekëve dhe të infermierëve të infektuar me koronavirus në Kosovë.
Në bazë të të dhënave të fundit, në Kosovë aktualisht janë 449 raste të të infektuarve me koronavirus, 12 raste të vdekjes si dhe 79 të shëruar.
Disa këshilla nga Organizata Botërore e Shëndetësisë:
Si dhe kur duhet të përdoret maska?
Vdes edhe një pacient me koronavirus në Kosovë
Një qytetar nga qyteti i Ferizajt është personi i 12 që ka vdekur pas infektimit me koronavirus në Kosovë.
Klinika Infektive e Qendrës Klinike Universitare të Kosovës njofton se S.M., 70 vjeç, ka vdekur pas disa ditëve në trajtim.
Bëhet e ditur se S.M ishte shtrirë në Klinikën Infektive më 12 prill dhe se, krahas koronavirusit, vuante edhe nga sëmundje të tjera shoqëruese.
“Pacienti ka qenë në gjendje të rëndë që nga pranimi në Klinikën Infektive, testi për SARS-CoV- 2 ka rezultuar pozitiv dhe përveç sëmundjes COVID-19 ka pasur edhe sëmundje të tjera shoqëruese”, thuhet në njoftimin e Qendrës Klinike Universitare të Kosovës.
Në bazë të të dhënave të fundit, në Kosovë janë gjithsej 449 raste të të infektuarve me koronavirus, 12 raste të vdekjes dhe 79 të shëruar.
Mbi 5,000 të vdekur nga koronavirusi në Belgjikë
Mbi 5,000 persona kanë vdekur nga koronavirusi në Belgjikë, njoftuan autoritetet.
Kjo shifër paraqet një normë të lartë të vdekshmërisë për kokë banori, në krahasim me shumicën e vendeve të tjera evropiane.
Në një konferencë për media të premten, autoritetet shëndetësore thanë se kanë regjistruar 313 viktima në 24 orët e fundit, që e rrisin në 5,163 numrin e përgjithshëm të tyre.
Gjysma e viktimave janë regjistruar në shtëpitë e pleqeve dhe gjysma tjetër në spitale.