Trump thotë se masat kufizuese të disa shteteve janë "shumë të rënda"
Presidenti i Shteteve të Bashkuara, Donald Trump, ka arsyetuar postimet e tij në Twitter përmes të cilave kishte përkrahur protestat në disa shtete kundër masave të kufizimit të lëvizjes.
Në adresimin e tij të premten, ai tha se masat e vendosura nga Minesota, Miçigan dhe Virxhinia, janë mjaft të rënda.
Në një postim më herët në Twitter, Trump kishte shkruar: “Çlirojeni Minesotën, Çlirojeni Miçigenin dhe pastaj Çlirojeni Virxhinian”.
Autoritetet shëndetësore thonë se këto masa janë tejet të nevojshme për parandalimin e përhapjes më të madhe të koronavirusit. Por, protestuesit thonë se këto masa janë duke i bërë dëm qytetarëe dhe ekonomisë.
Shtetet e Bashkuara kanë pasur rritjen më të madhe të viktimave brenda një dite, të enjten, duke shënuar 4,591 vdekje në 24 orë.
SHBA-ja ka numrin më të madh të rasteve dhe viktimave në botë, rreth 700,000 raste të konfirmuara dhe më shumë se 36,000 viktima, sipas John Hopkins.
Shtetet për të cilat ngriti zërin Trump janë të udhëhequra nga demokratët. Ndërkaq, Ohio dhe Utah, të udhëhequra nga republikanët, që kanë të vendosura masat e njëjta, nuk u përmendën nga ai.
Protestat pritet të rriten edhe në shtete të tjera në SHBA. Mbështetja e presidentit vjen një ditë pasi administrata e tij prezantoi udhëzimet e reja për rihapjen e ekonomive shtetërore.
Lufta e mjekëve me koronavirusin, përballë mosveprimit të qeverive
Asnjë cep i globit nuk është kursyer nga koronavirusi ngjitës – ose përpjekjet për ta ngadalësuar përhapjen e tij.
Taktika të ndryshme janë duke u përdorur – përfshirë izolimin, distancimin fizik dhe masa të tjera kufizuese. Megjithatë, edhe ato mund të minohen nga mungesa e furnizimeve dhe e transparencës.
Radio Evropa e Lirë u ka hedhur një vështrim sfidave me të cilat përballen punonjësit shëndetësorë dhe të tjerët, në trajtimin e pandemisë së koronavirusit.
Artikullin e plotë mund ta lexoni në këtë link.
Autoritetet bëjnë ndryshime të Pakos Fiskale Emergjente
Qeveria në detyrë e Kosovës ka njoftuar për ndryshimin dhe plotësimin e vendimit për Pakon Emergjente Fiskale, që përcakton saktësisht përfitimet dhe përfituesit e pakos në fjalë.
Përmes një komunikate për media, Qeveria në detyrë ka thënë se: Ndryshimet dhe plotësimet e aprovuara të këtij vendimi përcaktojnë se përfitues të shumës prej 30 euro janë të gjithë përfituesit e skemave sociale dhe pensionale që marrin pagesë mujore me vlerë deri në njëqind euro; ndryshimi tjetër përcakton se përfitues të mbështetjes financiare do të jenë shoqëritë tregtare edhe punëdhënësit e tjerë.
Aty po ashtu bëhet e ditur se ndryshimet e vendimit përcaktojnë se përfitues të mbështetjes financiare janë stafi mjekësor dhe ai mbështetës (mjekët, infermierët dhe personeli tjetër i ekspozuar ndaj rrezikut).
Qeveria tashmë në detyrë e Kosovës ka miratuar kohë më parë Pakon Emergjente Fisklae, në vlerë prej rreth 180 milionë eurove për t’iu dalë në ndihmë bizneseve dhe kategorive tjera të shoqërisë të prekura pas përhapjes së koronavirusit.
Duke marrë parasysh të dhënat e fundit, deri më tani në Kosovë është raportuar për 480 persona të infektuar me sëmundjen Covid-19, që shkakton koronavirusi.
Në mesin e tyre, 84 pacientë janë shëruar, ndërsa 12 persona kanë vdekur.
Më qëllim të parandalimit të përhapjes së sëmundjes Covid-19, që shkakton koronavirusi, të mërkurën në Kosovë kanë hyrë në fuqi masat e reja të qarkullimit të qytetarëve.
Bazuar në masat e vendosura nga Ministria në detyrë e Shëndetësisë, qytetarët mund të dalin nga shtëpitë e tyre vetëm për 90 minuta në ditë, me qëllim furnizimi.
Kosovë: 31 raste të reja me koronavirus
Instituti Kombëtar i Shëndetësisë Publike në Kosovë ka njoftuar për 31 raste të konfirmuara me koronavirusin e ri në 24 orë, si dhe për pesë të shëruar nga ky virus.
“Rastet pozitive janë raste kontakti, pesëmbëdhjetë (15) raste nga komuna e Ferizajit (sipas vendbanimit: dhjetë (10) raste Ferizaj, tre (3) raste Mirash, një (1) rast Mirosal dhe një (1) rast Kosinë), nëntë (9) raste nga komuna e Vitisë ( sipas vendbanimit: tre (3) raste Viti, tre (3) raste Gushicë dhe tre (3) raste Pozharan), dy (2) raste me vendbanim në Prishtinë dhe me nga një (1) rast vendbanimet: Miradi e epërme-Fushë Kosovë, Skenderaj, Vojnovc-Shtime, Sllatinë-Leposaviq dhe Zubin Potok”, është thënë në njoftim.
Duke marrë parasysh të dhënat e fundit, deri më tani në Kosovë është raportuar për 480 persona të infektuar me sëmundjen Covid-19, që shkakton koronavirusi.
Në mesin e tyre, 84 pacientë janë shëruar, ndërsa 12 persona kanë vdekur.
Më qëllim të parandalimit të përhapjes së sëmundjes Covid-19, që shkakton koronavirusi, të mërkurën në Kosovë kanë hyrë në fuqi masat e reja të qarkullimit të qytetarëve.
Bazuar në masat e vendosura nga Ministria në detyrë e Shëndetësisë, qytetarët mund të dalin nga shtëpitë e tyre vetëm për 90 minuta në ditë, me qëllim furnizimi.
Orari i daljes është i organizuar në shtatë grupe, nga ora 07:00 deri në 22:30, dhe përcaktohet nga numri i parafundit personal në letërnjoftim.
Këto masa do të vlejnë deri më 4 maj, porse do të shqyrtohen në varësi të rezultateve, jo më vonë se data 30 prill.