Shërbeu me kafe qytetarët, arrestohet nga policia
Një person është arrestuar nga policia në Prishtinë, pasi ka shkelur vendimin e autoriteteve për parandalimin e përhapjes së koronavirusit të ri.
Sipas policisë, ky person, e kishte hapur lokalin e tij dhe kishte shërbyer me kafe qytetarët.
"Nga njësiti policor i dyshuari mashkull kosovar, është hasur duke i shërbyer qytetarët me kafe dhe kishte hapur lokalin për të punuar duke mos e zbatuar kështu vendim për parandalim të përhapjes së pandemisë. I dyshuari pas intervistimit me urdhër të prokurorit është liruar në procedurë të rregullt", thuhet në njoftimin e policisë.
Më qëllim të parandalimit të përhapjes së sëmundjes Covid-19, të mërkurën në Kosovë kanë hyrë në fuqi masat e reja të qarkullimit të qytetarëve.
Këto masa do të vlejnë deri më 4 maj, porse do të shqyrtohen në varësi të rezultateve jo më vonë se data 30 prill.
Gjermania raporton për 3,609 raste të reja me koronavirus
Në Gjermani, të shtunën, janë konfirmuar 3,609 raste të reja të të infektuarve me koronavirusin e ri.
Numri i përgjithshëm i rasteve, në këtë vend, ka arritur në 137,439 njoftoi Instituti për Sëmundjet Infektive, Robert Koch.
Gjatë 24 orëve të fundit ka pasur 242 vdekje të reja, duke e rritur numrin e përgjithshëm të viktimave në 4,110.
Dje, ministri gjerman i Shëndetësisë, Jens Spahn ka thënë se shpërthimi i koronavirusit është nën kontroll, pas uljes së shkallës së infektimit.
Të dhënat e publikuara nga Agjencia gjermane për Kontrollin e Sëmundjeve tregojnë se shkalla e infektimit është ulur për 0.7, që nënkupton se një person i infektuar ka bartur sëmundjen në më pak se një person tjetër.
Mbi 10 mijë të infektuar në Japoni
Numri i rasteve të infektuar me koronavirus në Japoni u rrit në 10,000 të shtunën, tha transmetuesi publik NHK.
Disa ditë më parë autoritetet shpallen gjendje të jashtëzakonshme në të gjithë vendin në përpjekje për të ngadalësuar përhapjen e virusit.
Kryeministri japonez, Shinzo Abe, të premten u bëri thirrje qytetarwve të qëndrojnë brenda.
Mbi 200 njerëz kanë vdekur nga virusi në Japoni, por Tokio mbetet zona me goditjen më të rëndë nga pandemia.
FMN dhe BB zotohet për më shumë angazhim ndaj krizës së pandemisë
Fondi Monetar Ndërkombëtar (FMN) dhe Banka Botërore, janë zotuar të rritin përpjekjet e tyre për të qetësuar goditjen në ekonominë globale nga pandemia e koronavirusit.
Drejtorja e FMN-së, Kristalina Georgieva dhe presidenti i Bankës Botërore, David Malpass theksuan, se agjencitë e tyre janë të vetëdijshme për kërcënimin në rritje nga një krizë shëndetësore.
"Një tkurrje e madhe e ekonomisë globale në gjysmën e parë të vitit 2020 është e pashmangshme", tha Georgieva.
"Pasiguria rreth ashpërsisë dhe kohëzgjatjes së krizës është jashtëzakonisht e lartë", shtoi ajo.
FMN po parashikon që ekonomia globale do të tkurret me 3 përqind këtë vit, rënia më e keqe që nga Depresioni i Madh në vitet '30 dhe më e rëndë se kriza më e fundit financiare që filloi në vitin 2008.
Të dy institucionet gjatë dy muajve të fundit kanë paraqitur një numër programesh mbështetëse. FMN-ja ka shqyrtuar kërkesa për kredi urgjente nga pothuajse gjysma e 189 vendeve të saj anëtare.
FMN dhe Banka Botërore morën mbështetje këtë javë nga G20-ta, apo grupi i vendeve kryesore industriale, për një moratorium për shlyerjen e borxheve për vendet më të varfra në botë - si Afganistani, Etiopia dhe shumë vende afrikane.
Sekretari i Përgjithshëm i Kombeve të Bashkuara tha se moratoriumi i borxhit për vendet më të varfra ishte një fillim i mirë, por duhet bërë më shumë duke marrë parasysh ashpërsinë e krizës aktuale.