Mbi 20 mijë të vdekur në Spanjë
Numri i njerëzve që kanë vdekur nga koronavirusi në Spanjë ka kaluar shifrën 20,000, njoftoi Ministria e Shëndetësisë.
Vetëm gjatë 24 orëve të fundit janë konfirmuar 565 vdekje të reja.
Spanja është një nga vendet më të goditura nga pandemia, pas Shteteve të Bashkuara dhe Italisë.
Në këtë vend, janë konfirmuar si të infektuar rreth 190,839 njerëz.
Rritet numri i vdekjeve në Zvicër
Zvicra ka njoftuar se numri i përgjithshëm i vdekjeve nga koronavirusi i ri ka arritur në 1,111.
Një ditë më parë, të premten, ky numër ishte 1,059.
Autoritetet njoftuan se numri i përgjithshëm i të infektuarve ka shkuar në 27,404.
Të dhënat janë bërë publike nga Agjencia e Shëndetit Publik të Zvicrës.
Infektohen me koronavirus një pjesë e stafit të presidentit të Afganistanit
Burime qeveritare në Afganistan thonë se të paktën 20 zyrtarë që punojnë në pallatin e presidentit të Afganistanit, Ashraf Ghani, kanë dalë pozitiv në testin e COVID-19.
Kjo ka bërë që udhëheqësi 70-vjeçar të kufizojë pjesën më të madhe të kontaktit të tij me stafin dhe atë ta zhvillojë online.
"Një dokument i kontaminuar u dërgua në një zyrë brenda pallatit nga një departament tjetër qeveritar dhe kjo ishte mënyra se si u infektuan punonjësit", tha zyrtari, duke folur në kushte anonimiteti.
Sediq Sediqqi, zëdhënësi i presidentit, tha se Komisioni i Shërbimit Civil tashmë ka kërkuar nga punonjësit e qeverisë të qëndrojnë në shtëpi.
Deri më tani në Afganistan janë konfirmuar 933 raste të të infektuarve, ndërsa 30 njerëz kanë vdekur, sipas të dhënave të Universitetit Johns Hopkins në Shtetet e Bashkuara.
Zyrtarët shëndetësorë afganë thonë për shkak të testimeve të kufizuara, numri i rasteve ka të ngjarë të jetë shumë më i lartë se sa raportohet .
Ministria e Shëndetësisë në Afganistan ka paralajmëruar se nëse nuk përmirësohen masat e kontrollit në të gjithë vendin, vendi po shkon drejt një katastrofe në të cilën miliona njerëz mund të infektohen.
Shqipëria me 9 raste të reja të të infektuarve
Zëvëndëvësministrja e Shëndetësisë në Shqipëri, Mira Rakacolli ka njoftuar se gjatë 24 orëve të fundit janë konfirmuar edhe 9 raste të të infektuarve me COVID-19.
"Kjo shifër tregon për një kontroll të mirë të epidemisë", tha ajo.
Numri i përgjithshëm i të infektuarve ka arritur në 548 raste.
Sipas autoriteteve shëndetësore deri më tani kanë vdekur 26 pacientë që kanë qenë të infektuar me koronavirusin e ri.
Gjatë 24 orëve të fundit janë shëruar 19 pacientë duke e çuar numrin e përgjithshëm të të shëruarve në 302.