Nju Jorku shënon numrin më të ulët të viktimave në më shumë se dy javë
Guvernatori i Nju Jorkut, Andrew Cuomo, tha të shtunën se 540 njerëz kanë vdekur nga koronavirusi në 24 orët e fundit.
Kjo është shifra më e ulët e viktimave brenda një dite, e regjistruar qysh më 1 prill.
Nju Jorku është shteti më i prekur amerikan nga koronavirusi.
Duke folur në konferencë për media, Cuomo tha se numri i pranimeve të reja në spitale mbetet rreth 2,000 në ditë, që, sipas tij, vazhdon të jetë “numër i lartë”.
Bie numri i viktimave që regjistrohen brenda një dite në Itali
Numri i viktimave nga koronavirusi në Itali është rritur për 482 të shtunën, që është shifra më e ulët brenda një dite, qysh më 12 prill, kur janë regjistruar 431 viktima.
Agjencia për Mbrojtjen Civile tha se numri i rasteve të reja mbetet stabil – me 3,491 të konfirmuara në 24 orët e fundit, krahasuar me 3,493 në 24-orëshin paraprak.
Numri i të vdekurve është rritur për 575 të premten, nga 525 sa ka qenë ditën paraprake.
Numri i përgjithshëm i viktimave nga koronavirusi në Itali është 23,227, ndërsa i rasteve të konfirmuara 175,925.
Italia ka numrin më të madh të viktimave në Evropë, ndërsa pas saj vjen Spanja me 20,043.
Qytetet në Itali janë izoluar tash e sa javë, ndërsa më 14 prill, autoritetet kanë nisur me lehtësimin e masave të kufizimit, duke i lejuar disa kompani të rifillojnë operimet.
Disa këshilla nga Organizata Botërore e Shëndetësisë:
Si dhe kur duhet të përdoret maska?
Ortodoksët festojnë Pashkët nën masa izolimi
Të krishterët ortodoksë i festojnë Pashkët këtë fundjavë nën masa të ashpra izolimi për shkak të pandemisë së koronavirusit.
Autoritetet në Evropën Lindore dhe në Lindjen e Mesme kanë urdhëruar që shërbimet fetare të bëhen pa praninë e njerëzve.
Në Gjeorgji, megjithatë, besimtarët do të mund të shkojnë në kishë.
Ceremonia tradicionale e Zjarrit të Shenjtë u zhvillua në një kishë gati të zbrazët në Jerusalem.
Kisha është mbyllur muajin e kaluar dhe vetëm një pjesë e vogël e klerit ortodoks u lejua për ceremoni.
Kisha Ortodokse e Rusisë tha se ndërpret traditën e saj vjetore dhe se u bën thirrje miliona besimtarëve që të mos i frekuentojnë objektet fetare.
Në Ukrainë, zyrtarët thanë se policia do të vendoset përreth kishave për të mos lejuar tubime të mëdha të njerëzve.
Në Greqi, kufizimet e lëvizjes deri më tani janë vlerësuar gjerësisht për frenimin e përhapjes së koronavirusit.
Koronavirusi, që e shkakton sëmundjen COVID-19, ka infektuar mbi 2.2 milionë njerëz në gjithë botën, ndërsa ka vrarë mbi 156,000.