Kufiri SHBA-Kanada mbetet i mbyllur edhe për një muaj
Kufiri SHBA-Kanada do të mbetet i mbyllur edhe për një muaj, për të frenuar përhapjen e koronavirusit, tha kryeministri i Kanadasë, Justin Trudeau.
Në një fjalim të mbajtur të shtunën, Trudeau tha se të dyja vendet janë pajtuar për vazhdimin e mbylljes.
“Ky është një vendim i rëndësishëm, që do t’i mbajë të sigurt njerëzit në të dyja anët”, tha ai.
Kufiri ka qenë i mbyllur për më shumë se tri javë, përveç për transportin e mallrave.
Presidenti i SHBA-së, Donald Trump, ka thënë këtë javë se dëshiron që kufiri me Kanadanë të jetë në mesin e të parëve që hapen.
Para pandemisë së koronavirusit, rreth 400,000 njerëz kanë kaluar kufirin SHBA-Kanada çdo ditë.
Ai është më i gjati në botë: 8,900 kilometra.
Shtetet e Bashkuara kanë numrin më të madh të njerëzve të prekur me koronavirus, me mbi 711,000 njerëz të infektuar dhe me mbi 37,000 të vdekur.
Kanadaja ka afro 33,000 njerëz të infektuar.
Portugalia do t’i lehtësojë kufizimet në maj
Portugalia do të nisë lehtësimin e masave të izolimit nga muaji maj, tha kryeministri Antonio Costa.
Ai i tha gazetës lokale Expresso se rregullat e reja do të shpallen më 30 prill.
Kryeministri tha se qeveria po mendon hapjen e dyqaneve të shitjes me pakicë dhe të kopshteve, kur të skadojë gjendja e jashtëzakonshme më 2 maj.
Restorantet dhe kafenetë, ashtu si edhe kinematë dhe institucionet kulturore, mund të rihapen para verës, por tubimet e mëdha publike do të vazhdojnë të jenë të ndaluara për një të ardhme të parashikueshme, tha kryeministri.
Në Portugali aktualisht janë 20,000 të infektuar me koronavirus, ndërsa afro 700 pacientë kanë humbur jetën.
Organizata Botërore e Shëndetësisë sjell disa këshilla:
Kujdesi në shtëpi për personat e prekur nga koronavirusi
Mbi 19,000 të vdekur nga koronavirusi në Francë
Autoritetet në Francë njoftuan se 364 njerëz kanë vdekur në 24 orët e fundit, pas kontraktimit të koronavirusit, duke e çuar totalin kombëtar në 19,323.
Numri i rasteve të konfirmuara në këtë vend është rritur gjithashtu në afro 112,000.
Por, Ministria e Shëndetësisë tha se numri i personave që trajtohen në njësi të kujdesit intensiv ka rënë për të dhjetën ditë radhazi.
Franca, pas Spanjës dhe Italisë, ka numrin më të madh të të infektuarve në Evropë.
Këtë javë, presidenti i Francës, Emmanuel Macron, e ka zgjatur izolimin atje deri më 11 maj.
Macron ka thënë se kufizimet aktuale e kanë ngadalësuar virusin, por nuk e kanë mundur atë.