Kur është koha për të dalë nga izolimi?
Pas disa javësh, e në disa raste muajsh, të izolimit fizik dhe ekonomik, për shkak të koronavirusit, qytetarët dhe udhëheqësit politikë në gjithë botën janë të etur për t’iu dhënë fund këtyre bllokadave. Pyetja është: si?
Guvernatori i Nju Jorkut kërkon kujdes ndonëse shkalla e infektimit bie
Guvernatori i Nju Jorkut, Andrew Cuomo ka thënë se shteti i tij “ka kaluar pikën më të lartë” të shpërthimit të koronavirusit, mirëpo ka bërë thirrje për kujdes teksa rritet numri i të vdekurve.
“Ulja eventuale vazhdon në varësi të asaj që bëjmë”, ka thënë Cuomo në një konferencë për media.
“Kjo është vetëm gjysma e gjithë situatës. Shpërthimi është duke u zbehur, nuk është duke u rritur”, ka thënë ai, ndonëse ka shtuar se “margjina e gabimit është shumë e vogël”.
Nju Jorku ka regjistruar 507 vdekje në 24 orët e fundit, duke vazhduar trendin e rënies së numrit të viktimave.
“Ky është lajm i mirë”, ka thënë Cuomo “duke marrë parasysh lajmin e tmerrshëm me të cilin kemi jetuar: rritje të vazhdueshme”.
“Ne ende kemi punë për të bërë”, ka thënë guvernatoi.
Sa u përket zyrtarëve lokalë, që po përballen me presion rreth mbylljes së shkollave, parqeve dhe bizneseve, ai ka thënë, “më fajësoni mua”.
Komuniteti ndërkombëtar bën thirrje për mënjanim të politikës në kohë të koronavirusit
Shefja e Zyrës së Bashkimit Evropian në Prishtinë, Natalia Apostolova, shefat e misioneve të BE-së, ambasadorët e Mbretërisë së Bashkuar, Zvicrës, Norvegjisë, shefi i EULEX-it dhe koordinatori për Zhvillim i Kombeve të Bashkuara, kanë bërë thirrje për lënien mënjanë të politikës në kohën e shpërthimit të koronavirusit në Kosovë.
Ata po ashtu u kanë bërë thirrje udhëheqësve politikë që të përmbahen nga politizimi i ndihmës së vlefshme dhe të nevojshme ndërkombëtare.
“Në krizën e paprecedentë shëndetësore të COVID-19, ju, populli i Kosovës, po tregoni qëndrueshmëri dhe përgjegjësi. Ndërkohë që të gjithë jemi të pritje të kthimit të planifikuar me kujdes në normalitet, sa më shpejt që të jetë e mundur, këmbëngulja juaj mbetet e domosdoshme për ta zvogëluar ndikimin e shpërthimit dhe për të parandaluar një krizë edhe më të rëndë”, është thënë mes tjerash në deklaratë.
Kosova, sikur shumica e vendeve në botë është duke u përballur me koronavirusin e ri, nga i cili janë infektuar 510 persona, derisa 12 pacientë kanë vdekur.
Më qëllim të parandalimit të përhapjes së sëmundjes Covid-19, që shkakton koronavirusi, të mërkurën në Kosovë kanë hyrë në fuqi masat e reja të qarkullimit të qytetarëve.
Të rejat e fundit nga Britania e Madhe...
Qeveria britanike ka mbajtur të dielën një konferencë për media rreth koronavirusit dhe ka bërë këto njoftime:
- Sekretari për Edukim, Gavin Williamson ka falënderuar shkollat, infermierët dhe shërbimet për fëmijë, për “rolin vital” që janë duke luajtur
- Megjithatë, ai nuk ka dhënë informacione se kur do të rihapen shkollat.
- Williamson ka listuar një numër të masave që ka marrë qeveria për fëmijët me aftësi të kufizuara, që tentojnë të mësojnë në shtëpi, duke përfshirë blerjen e laptopëve për ata që duan të përgatiten për testime, si dhe qasjen në internet për ata që nuk kanë.
- Ministri ka thënë se ekzistojnë “përpjekje kombëtare” për t’u siguruar se stafi i sistemit shëndetësor ka pajisjet mjekësore që i duhen
- Ai po ashtu ka thënë se kryeministri britanik, Boris Johnson ka udhëhequr qeverinë, pavarësisht kritikave se ai ka munguar në takimet për pandeminë
- Mjekja, Jenny Harries ka thënë se është i vështirë krahasimi me vendet tjera, kur është në pyetje virusi
- Ajo ka thënë se Mbretëria e Bashkuar duhet të presë 12 muaj tjerë apo më shumë për të kuptuar çfarë ka ndikuar në dallimet në shkallën e vdekshmërisë.
Sipas të dhënave të Universitetit Johns Hopkins, Britania deri më tani ka regjistruar 121,168 të infektuar dhe 16,095 të vdekur, si pasojë e sëmundjes Covid-19, që shkakton koronavirusi.