Presidenti i Brazilit u bashkohet protestave kundër izolimit
Presidenti i Brazilit, Jair Bolsonaro, është kritikuar, pasi u është bashkuar protestuesve që kërkojnë heqjen e kufizimeve, të vëna për shkak të pandemisë së koronavirusit.
Bolsonaro është përplasur javëve të fundit me guvernatorët e shteteve që kanë ndërmarrë masa izolimi, duke i cilësuar ato si “diktatoriale”.
Duke iu adresuar protestës, të dielën në Brazilia, Bolsonaro ka thënë se protestuesit janë "atdhetarë" që mbrojnë liritë individuale.
Deri të dielën, Brazili ka pasur mbi 38,000 raste të konfirmuara me koronavirus, që është numri më i lartë në Amerikën Latine.
Mbi 2,400 pacientë, ndërkaq, kanë humbur jetën.
"E gjithë bota është e bashkuar kundër koronavirusit, por në Brazil duhet të luftojmë koronavirusin dhe virusin e autoritarizmit", ka shkruar në një postim në Twitter Rodrigo Maia, kryetar i Dhomës së Deputetëve të Brazilit, njëherësh kritik i Bolsonaros.
Maqedoni e Veriut: Qeveria harton strategji për lehtësimin e masave
Maqedonia e Veriut ndodhet në ditën e tretë të karantinës prej 85 orësh, e cila ka filluar të premten pasdite dhe përfundon të martën, në orën pesë të mëngjesit.
Nga Qeveria e Maqedonisë së Veriut bëjnë të ditur se janë në përpilim të një plani, në bazë të të cilit do të fillojë lehtësimi i masave për kufizimin e lëvizjes së qytetarëve.
Kryeministri i Maqedonisë së Veriut, Oliver Spasovski, ka thënë të hënën se jeta do të fillojë të kthehet në normalitet pas 1 majit.
Tekstin e plotë mund ta lexoni këtu.
Gjokoviq kundërshton vaksinimin e detyrueshëm për koronavirus
Tenisti numër një në botë për meshkuj, Novak Gjokoviq, tha se është kundër vaksinimit për COVID-19, sëmundjen që e shkakton koronavirusi.
Gjokoviq tha se do të duhet të marrë një “vendim” nëse lojtarët detyrohen të vaksinohen.
“Nuk do të doja të detyrohem që të marr vaksinën, për të pasur mundësi për të udhëtuar”, tha Gjokoviq gjatë një paraqitjeje të drejtpërdrejtë në Facebook.
Ai dhe famija e tij ndodhen të izoluar në Spanjë, për shkak të pandemisë së koronavirusit.
“Nëse bëhet e detyrueshme, çfarë do të ndodhë? Do të më duhet të marr një vendim. Unë i kam mendimet e mia për këtë çështje”, tha Gjokoviq.
“Nëse sezoni rinis në korrik, gusht ose shtator – edhe pse ka pak gjasa – e kuptoj se vaksina do të bëhet kërkesë”, shtoi ai.
Tash për tash, të gjitha turnetë e tenisit janë të pezulluara deri më 13 korrik.
Turneu i Wimbledonit është anuluar për herë të parë që nga Lufta e Dytë Botërore, ndërsa French Open është shtyrë për katër muaj dhe pritet të zhvillohet në fund të shtatorit.
Irani lehtëson disa masa të izolimit
Në Iran u hapën autostradat midis qyteteve dhe qendrat tregtare, edhe pse ky vend vazhdon të përballet me numër të lartë të të infektuarve me koronavirus.
Aktualisht, Irani ka mbi 80,000 raste të konfirmuara dhe mbi 5,000 viktima.
Lehtësimi i masave përfshin edhe hapjen e Pazarit të Madh të Teheranit.
Bizneset e tjera, përfshirë restorantet, mbeten të mbyllura.
Me afrimin e Muajit të Ramazanit, i cili nis më 23 prill, udhëheqësi suprem i Iranit, Ajatollah Ali Khamenei, ka paralajmëruar se tubimet masive mund të ndalohen.
