Maqedonia e Veriut shënon ulje të infektimeve nga koronavirusi
Maqedonia e Veriut ka regjistruar ditën e parë me numrin më të vogël të të infektuarve me koronavirus, që nga paraqitja e rastit të parë më 27 shkurt në qytetin e Dibrës.
Sipas Ministrisë së Shëndetësisë, gjatë 24 orëve të fundit janë shënuar vetëm 7 raste dhe asnjë prej tyre në Shkup, që ka numrin më të madh të të infektuarve në vend. Në Tetovë janë regjistruar tre të infektuar, dy në Kumanovë dhe dy në qytetin e Koçanit.
Numri i përgjithshëm i të infektuarve ka arritur në 1231 kurse numri i personave të shëruar ka arritur në 224. Është regjistruar edhe një viktimë, me çka numri i të vdekurve ka arritur në 55.
Hollësitë tjera i kuptoni duke klikuar këtu.
Kryeministri i Italisë paralajmëron plan për dalje nga izolimi
Italia, në fund të kësaj jave, do të shpallë planin për heqje graduale të masave të izolimit, të ndërmarra për frenimin e koronavirusit, tha kryeministri italian, Giuseppe Conte.
Në një postim në Facebook, Conte tha se ky vend nuk mund të heqë dorë nga politika e “kujdesit maksimal” dhe se do të rihapet në përputhje me "politikat serioze shkencore".
"Një pritje e arsyeshme është që ne ta zbatojmë planin nga 4 maji", tha Conte.
Italia ka numrin më të madh të viktimave nga koronavirusi në Evropë: 24,114.
Të dhënat e publikuara të hënën, kanë treguar se numri i të infektuarve atje ka rënë për herë parë prejse ka nisur shpërthimi i sëmundjes, në pjesën e parë të marsit.
Autoritetet italiane kanë thënë se rënia simbolike e rasteve është një “zhvillim pozitiv”.
Pas Italisë, vendet më të prekura në Evropë janë Spanja dhe Franca – të dyja me më shumë se 20,000 viktima nga koronavirusi.
Shtetet e Bashkuara prijnë edhe për nga numri i të infektuarve, edhe i viktimave.
Izraeli i izoluar shënon Ditën e Kujtimit të Holokaustit
Izraeli po shënon Ditën e Kujtimit të Holokaustit nën hijen e pandemisë së koronavirusit.
Sipas traditës, i gjithë vendi u ndal kur sirenat u lëshuan të martën në mëngjes, për të kujtuar gjashtë milionë hebrenjtë që u vranë nga nazistët dhe bashkëpunëtorët e tyre gjatë Luftës së Dytë Botërore.
Shoferët ndaluan makinat e tyre dhe dolën jashtë për dy minuta.
Meqë shumica e njerëzve janë të izoluar për shkak të koronavirusit, shumë prej tyre dolën në ballkone.
Ministria e Shëndetësisë e Izraelit ka raportuar për mbi 13,700 njerëz të infektuar me koronavirus dhe 177 viktima.