Porosia e Erdës
Një vajzë me sindromën Down nga Mitrovica, tregon për aktivitetet e saj gjatë izolimit në shtëpi, si pasojë e përhapjes së koronavirusit.
Mbi 22 punëtorë shëndetësorë të infektuar me koronavirus në Kosovë
Më shumë se 22 punëtorë shëndetësorë në Kosovë janë infektuar me sëmundjen COVID-19, që shkakton koronavirusi i ri, kurse 130 janë në vetizolim, ka thënë për Radion Evropa e Lirë, Blerim Syla, Kryetari i Federatës e Sindikatave të Shëndetësisë së Kosovës.
Ai shtoi se, bazuar ne informacionet e deritashme, gjendja e tyre është e kënaqshme, ndonëse ekziston shqetësimi se numri mund të rritet.
Ai u bëri thirrje institucioneve përkatëse të shtojnë kujdesin ndaj masave personale mbrojtëse për punëtorët shëndetësorë, duke shtuar se "koncentrimi ma i madh është në ata te fronti i parë, duke harruar ata në vijën e dytë e të tretë".
Deri më tash, Kosova ka regjistruar 598 raste të të infektuarve me koronavirusin e ri, – prej tyre 123 janë shëruar.
Numri i viktimave të martën ka arritur në 16.
Numri i të vdekurve në Angli rritet për 778
Autoritetet britanike kanë njoftuar për 778 viktima të reja, si pasojë e koronavirusit të ri në 24 orët e fundit.
Të dhënat e fundit, e dërgojnë numrin total të të vdekurve në Mbretërinë e Bashkuar në 15,607.
Shifrat e fundit përfshijnë vetëm viktimat në spitale dhe jo në qendra tjera, siç janë shtëpitë e kujdesit.
Ndërkohë Qeveria britanike është “absolutisht” e përkushtuar për të arritur synimin e kryrjes së 100,000 testeve për koronavirus brenda ditës, deri në fund të muajit prill, pavarësisht pse të hënën janë kryer më pak se 40,000 teste.
Zëdhënësi i kryeministrit ka thënë se kapaciteti total i testimeve brenda ditës është 39,250.
Qeveria po ashtu ka ripërsëritur se po shqyrton idenë e vendosjes së maskave.
Autoritetet britanike deri më tani kanë rekomanduar vendosjen e tyre vetëm në sektorin shëndetësor dhe atë për kujdes social, ndonëse disa shtete kanë marrë vendim për përdorimin e tyre nga e gjithë popullata.
Sipas të dhënave të Universitetit Johns Hopkins, Mbretëria e Bashkuara ka regjistruar 125,856 persona të infektuar me sëmundjen Covid-19, që shkakton koronavirusi.
Irani liron përkohësisht të burgosurit e huaj
Irani ka njoftuar të martën për 88 vdekje të reja, si pasojë e koronavirusit të ri, teksa autoritetet kanë liruar më shumë se 1,000 të burgosur të huaj për shkak të pandemisë.
Sipas zëdhënësit të Ministrisë së Shëndetësisë, Kianoush Jahanpour, marrë parasysh numrin e viktimave në 24 orët e fundit, numri total i të vdekurve në këtë shtet ka arritur në 5,297.
Shtetasit e huaj kanë qenë në mesin e 100,000 të burgosurve që janë liruar në disa faza nga muaji mars.
Aty është përfshirë gruaja britaniko-iraniane, Nazanin Zaghari-Ratcliffe, e arrestuar më 2016, e cila është dënuar me pesë vjet burgim për rebelim.
“Çfarë ka bërë Irani është se po garanton shëndetin e të burgosurve dhe dhënia e lejes për liri është një veprim i rëndësishëm” në krahasim me atë që kanë bërë shtetet tjera, ka thënë zëdhënësi i gjyqësorit, Gholamhossein Esmaili.
Një panel i ekspertëve të Kombeve të Bashkuara për të Drejta të Njeriut i ka bërë thirrje Iranit javën e kaluar për zgjatje të listës së të burgosurve që duhen të lirohen përkohësisht, pas përhapjes së sëmundjes Covid-19, që shkakton koronavirusi i ri.
Esmaili në anën tjetër ka thënë se Irani nuk duhet të kritikohet për “qasjen diskriminuese” pasi ka vepruar në mënyrë të “shkëlqyeshme” në krahsim me Britaninë dhe Shtetet e Bashkuara.
Sipas të dhënave të Universitetit Johns Hopkins, Irani deri më tani ka regjistruar 84,802 persona të infektuar me koronavirusin e ri.