Teatri s’ndalet as në kohën e pandemisë
Sallat e Teatrit Kombëtar të Kosovës janë boshe, si pasojë e pandemisë së koronavirusit të ri, por ky institucion nuk e ka ndalur punën dhe shfaqjet po i transmeton drejtpërsëdrejti në rrjete sociale. Aktori Adrian Morina i fton qytetarët që t’i shikojnë shfaqjet në kohën sa ata janë në izolim.
Rritet numri i abonentëve në Netflix në kohë të pandemisë
Kanali televiziv Netflix tha se ka pasur rritje të madhe të numrit të abonentëve këtë vit, pasi izolimi ndaj koronavirusit ka mbyllur miliarda njerëz në shtëpi.
Gati 16 milionë njerëz krijuan llogari në Netflix në tre muajt e parë të vitit, tha kompania amerikane.
Kjo shifër, sipas saj, është pothuajse dyfishi i abonentëve të rinj që janë regjistruar në muajt e fundit të vitit 2019.
Megjithatë, Netflix, i cili qëndron pas disa prodhimeve miliona dollarëshe, tha se izolimi i ka ndaluar pothuajse të gjitha xhirimet në botë.
Kërkesa për filmat dhe dokumentaret në Netflix muajin e kaluar është rritur aq shumë, saqë kompania ka thënë se do të zvogëlojë cilësinë e videove të saj në Evropë, për të lehtësuar ngarkesën mbi ofruesit e shërbimeve të internetit.
Netflix ka punësuar edhe 2,000 njerëz për të mbështetur konsumatorët, pas kërkesave në rritje.
Spanja do të nisë daljen nga izolimi në gjysmën e dytë të majit
Kryeministri i Spanjës, Pedro Sanchez, tha se qeveria e tij planifikon që në gjysmën e dytë të majit të nisë lehtësimin e masave të izolimit, të ndërmarra për frenimin e pandemisë së koronavirusit.
Kufizimet do të lehtësohen ngadalë dhe gradualisht, tha Sanchez në një senacë parlamentare.
Sanchez pritet të zgjasë gjendjen e jashtëzakonshme në Spanjë deri më 9 maj.
Ky vend është izoluar më 14 mars.
Pas Shteteve të Bashkuara, Spanja ka numrin më të madh në botë të të infektuarve me koronavirus: mbi 204,000.
Mbi 21,000 pacientë të infektuar me koronavirus atje kanë vdekur.
Disa vende në Evropë kanë nisur këtë javë lehtësimin e masave të izolimit, përfshirë: Italinë, Austrinë, Gjermaninë, Danimarkën e të tjera.
Disa burra përgatisin ushqimin e dhuruar nga Dhoma e Industrisë dhe Minierave në Kabul të Afganistanit, për shpërndarje te njerëzit në nevojë, gjatë pandemisë së koronavirusit:
