Mbi 10,000 të infektuar me koronavirus në Poloni
Numri i personave të infektuar me koronavirus në Poloni arriti mbi 10,000 të mërkurën.
Përmes një postimi në Twitter, Ministria e Shëndetësisë në Poloni tha se numri i përgjithshëm i të infektuarve aktualisht ëshë 10,034, ndërsa i viktimave 404.
Polonia ka rreth 38 milionë banorë.
Të hënën, qeveria atje ka filluar t'i heqë disa kufizime të vendosura për të frenuar përhapjen e pandemisë.
Në QKUK janë të shtrirë 58 pacientë me koronavirus
Në Klinikën Infektive të Qendrës Klinike Universitare të Kosovës aktualisht janë të shtrirë 58 pacientë me koronavirus.
Prej tyre, një është në gjendje kritike dhe po trajtohet me ventilim mekanik, thuhet në njoftimin për media të QKUK-së.
Njëmbëdhjetë raste të tjera janë në trajtim me oksigjenoterapi dhe përkujdesje intensive, ndërsa 46 janë në gjendje stabile, thuhet po ashtu në njoftim.
Bëhet e ditur se katër pacientë të shëruar nga infeksioni, sot do të lirohen nga spitali.
Kosova deri më tash ka regjistruar 604 raste të të infektuarve me koronavirus; prej tyre 18 kanë vdekur, 128 janë shëruar.
Vala e dytë e koronavirusit “mund të jetë më e rëndë”
Vala e dytë e koronavirusit në Shtetet e Bashkuara mund të jetë edhe më shkatërruese, sepse ka të ngjarë të përkojë me fillimin e sezonit të gripit, thanë zyrtarët shëndetësorë amerikanë.
Robert Redfield, drejtor i Qendrave për Kontrollin dhe Parandalimin e Sëmundjeve, u bëri thirrje qytetarëve që t’i shfrytëzojnë muajt e ardhshëm për t’u përgatitur dhe për t’u vaksinuar kundër gripit.
"Ekziston mundësia që sulmi i virusit mbi vendin tonë, dimrin e ardhshëm, të jetë edhe më i rëndë se ai që sapo kaluam", tha Redfield në një intervistë për gazetën Washington Post.
“Do ta kemi në të njëjtën kohë edhe epideminë e gripit, edhe epideminë e koronavirusit", tha ai.
Shtetet e Bashkuara kanë numrin më të madh të të infektuarve dhe viktimave me koronavirus: mbi 800,000, përkatësisht mbi 45,000.
Miliarda njerëz në mbarë botën janë urdhëruar të qëndrojnë në shtëpi gjatë muajve të fundit, pasi qeveritë po përpiqen ta frenojnë përhapjen e virusit ngjitës.
