Kina vazhdon të mos regjistrojë viktima nga koronavirusi
Kina vazhdon të mbajë shifrat e njëjta të vdekjeve si pasojë e koronavirusit të ri për të gjashtën ditë me radhë, tregojnë të dhënat zyrtare.
Ky shtet ka raportuar për 10 raste të reja të të infektuarve të martën, për dallim nga 30 në ditën paraprake.
Numri i rasteve të importuara – udhëtarë që kthehen nga vendet tjera – ka rënë në gjashtë, për dallim nga 23 një ditë më parë.
Kina regjistron numrin e pacientëve pa simptoma në një tjetër listë, ndonëse numri edhe aty ka rënë në 27 nga 42 një ditë më parë.
Të dhënat e Kinës rreth këtij virusi konsiderohen të vështira për t’u verifikuar prandaj janë ngritur supozime se Pekini është duke tentuar të mbajë numrin e ulët ashtu që të tregojë se e ka virusin nën kontroll.
Për koronavirusin e ri është raportuar filimisht në Vuhan të Kinës në fund të vitit të kaluar.
Si pasojë e këtij virusi deri më tani në gjithë botën janë infektuar mbi 2.6 milionë persona derisa mbi 180,000 kanë vdekur.
Konfirmohen edhe 26 raste me koronavirus në Kosovë
Instituti Kombëtar i Shëndetit Publik në Kosovë (IKSHPK) njoftoi se janë konfirmuar edhe 26 raste të reja me koronavirus.
"Janë testuar gjithsej 172 mostra të marra nga Klinika Infektive, gjurmimi i kontakteve të rasteve në terren si dhe nga karantina në Qendrën studentore", thuhet në njoftim.
Me të dhënat e fundit, numri i përgjithshëm i të infektuarve në Kosovë arrin në 630.
IKSHPK-ja po ashtu bëri të ditur se të mërkurën janë shëruar edhe 10 pacientë, duke e çuar numrin e përgjithshëm të të shëruarve në 138.
Deri më tani në Kosovë 18 pacientë kanë humbur jetën.
Më qëllim të parandalimit të përhapjes së sëmundjes Covid-19, që shkakton koronavirusi, më 15 prill në Kosovë kanë hyrë në fuqi masat e reja të qarkullimit të qytetarëve.
Bazuar në masat e vendosura nga Ministria në detyrë e Shëndetësisë, qytetarët mund të dalin nga shtëpitë e tyre vetëm për 90 minuta në ditë, me qëllim furnizimi.
Orari i daljes është i organizuar në shtatë grupe, nga ora 07:00 deri në 22:30, dhe përcaktohet nga numri i parafundit personal në letërnjoftim.
Këto masa do të vlejnë deri më 4 maj, porse do të shqyrtohen në varësi të rezultateve, jo më vonë se data 30 prill.
Arrin në 25 mijë numri i të vdekurve në Itali
Numri i viktimave nga koronavirusi i ri në Itali e ka kaluar shifrën 25 mijë.
Italia është një nga vendet më të goditura nga pandemia e koronavirusit.
Shërbimet e mbrojtjes civile në Itali të mërkurën ka raportuar për 437 raste të vdekjeve gjatë 24 orëve të kaluara.
Sidoqoftë, numri i personave të regjistruar që aktualisht e bartin sëmundjen është 107.699, duke shënuar një rënie në krahasim me ditët e kaluara.
Numri i të vdekurve në Itali është i dyti në botë pas SHBA-së.
Kryeministri italian, Giuseppe Conte tha se deri në fund të kësaj jave, Italia do të njoftojë për një plan të daljes nga izolimi .
Në Kosovë 36 punonjës shëndetësor të infektuar me koronavirus
Në Kosovë 36 punonjës shëndetësor janë të infektuar më koronavirus, që nga shpërthimi i epidemisë muajin e kaluar.
Drejtori i Departamentit për Informim në Ministrinë e Shëndetësisë, Faik Hoti ka publikuar të dhënat e Institutit Kombëtar të Shëndetit Publik, për numrin e punonjësve shëndetësorë të prekur me koronavirus.
Sipas këtyre të dhënave,16 infermierë dhe 14 mjekë në institucionet shëndetësore, 4 mjekë dhe 2 infermierë jashtë institucioneve shëndetësore, një farmacist dhe një teknik i farmacisë, janë infektuar me koronavirusin e ri.
Kosova deri më tash ka regjistruar 604 raste të të infektuarve me koronavirus; prej tyre 18 kanë vdekur, 128 janë shëruar.