Vendosja e maskave do të bëhet e detyrueshme në Gjermani
Të gjitha shtetet gjermane kanë bërë të ditura planet për ta bërë të detyrueshme vendosjen e maskave, me qëllim të luftimit të koronavirusit të ri.
Bremeni ka qenë rajoni i parë federal që ka mbështetur masat, pasi Senati i tij ka konfirmuar vendimin të premten.
Vendosja e maskave do të jetë e detyrueshme kur përdoret transporti publik në gjithë Gjermaninë dhe gati të gjitha shtetet do të marrin vendim për vendosjen e tyre edhe gjatë blerjeve nëpër dyqane.
Kancelarja gjermane, Angela Merkel ka rekomanduar fuqishëm vendosjen e tyre javën e kaluar, kur ka lehtësuar masat e izolimit në nivel kombëtar.
Shtete të ndryshme kanë marrë vendime të ndryshme sa u përket udhëzimeve për përdorim të maskave.
Austria i ka bërë ato të detyrueshme gjatë blerjeve nga fillimi i këtij muaji, ndonëse Zvicra ka njoftuar të mërkurën se nuk të kërkojë vendosjen e tyre nga qytetarët, teksa lehtëson masat e izolimit.
Instiuti gjerman, Robert Koch ka konfirmuar për 145,694 persona të prekur dhe 4,879 të vdekur si pasojë e koronavirusit të ri në Gjermani.
A mund të jetë gjaku i të shëruarve ilaç për pacientët me COVID-19?
Transfuzioni i antitrupave nga të shëruarit te pacientët e sëmurë, krijon atë që njihet si imunitet pasiv, duke u ndihmuar atyre të luftojnë infektimin. Kjo është një metodë e paprovuar për të luftuar koronavirusin - por nuk është e re për mjekësinë. Ajo ishte përdorur gjatë pandemisë së vitit 1918, por edhe më herët, kundër sëmundjes së difterisë.
Foshnja njëmuajshe shërohet nga koronavirusi
Tajlanda e ka nisur ditën e enjte me lajm të mirë.
Një foshnjë njëmuajshe është shëruar nga koronavirusi në këtë vend, kanë njoftuar autoritetet.
Mjekët kanë përdorur katër ilaçe të ndryshme për ta shëruar foshnjën, është thënë në raportin e agjencisë së lajmeve, Reuters.
“Strategjia e përdorur për ta trajtuar këtë foshnje ka qenë duke i dhënë ilaçe për 10 ditë. Ne e kemi kontrolluar atë çdo ditë dhe pas pesë ditëve, incizimet kanë treguar për shërimin e tij gradual”, ka thënë Visal Moolasart nga Insituti për Sëmundje Infektuese në Bankok.
Deri më tani në këtë vend është raportuar për 2,826 persona të infektuar dhe 49 të vdekur si pasojë e koronavirusit të ri.
Pezullohet dhënia e leje-qëndrimit të përhershëm në SHBA
Presidenti amerikan, Donald Trump ka nënshkruar urdhrin ekzekutiv për të pezulluar përkohësisht dhënien e leje-qëndrimit të përhershëm në Shtetet e Bashkuara.
Kjo masë, që përjashton disa kategori, do të zbatohet për 60 ditë dhe më pas mund të zgjatet, ka thënë ai.
Trump ka thënë se ky urdhër është menduar për të mbrojtur vendet e punës për amerikanët, në një ekonomi të dëmtuar nga koronavirusi.
Kritikët kanë akuzuar atë se po shfrytëzon pandeminë për të zbatuar politikat e tij të ashpra për migrimin në vitin zgjedhor në SHBA.
“Kjo gjë do të sigurojë që amerikanët e papunë nga të gjitha profilet, do të jenë të parët në listë për punë, teksa ekonomia jonë rihapet”, ka thënë Trump nga Shtëpia e Bardhë.
Ky vendim pritet t’i japë fund praktikës së dhënës së leje-qendrimit të përhershëm për familejet e gjera, të cilat presidenti amerikan i konsideron si zinxhir të migrimit.
Megjithatë, vendimi bën përjashtim për gratë apo burrat e amerikanëve dhe fëmijët jashtë martesës nën moshën 21-vjeçare.
Urdhri i nënshkruar nga Trump ka pezulluar edhe Lotarinë e Vizave për Diversitet, nga e cila kanë fituar të drejtën e qëndrimit në SHBA rreth 50,000 persona në vit.
Shtetet e Bashkuara janë goditur më së keqi në botë nga koronavirusi i ri, pasi mbi 800,000 persona janë infektuar ndërkohë që mbi 46,000 pacientë kanë vdekur.
