Belgjika nis lehtësimin e masave të izolimit në maj
Autorietet në Belgjikë kanë vendosur të nisin lehtësimin e masave të izolimit nga koronavirusi gjatë muajit maj.
Transmetuesi belg RTBF tha se heqja graduale e kufizimeve do të nisë nga 4 maji, me hapjen e disa dyqaneve më të mëdha dhe nisjen e disa orëve mësimore.
Në Belgjikë, aktualisht vetëm dyqanet që shesin ushqime, dyqanet për riparim të pajisjeve shtëpiake dhe barnatoret mund të hapen.
Distancimi fizik do të vazhdojë të mbetet rekomandim strikt, tha RTBF.
Belgjika ka mbi 44,000 raste të të infektuarve me koronavirus dhe 6,679 viktima.
Arrin në 2,600 numri i viktimave në Turqi
Turqia ka shënuar në 24 orët e fundit edhe 109 viktima nga koronavirusi, si dhe 3,122 të infektuar të rinj.
Me këto shifra, numri i përgjithshëm i viktimave shkon në 2,600, ndërsa i të infektuarve në 104,912, tha Ministria e Shëndetësisë.
Sipas saj, mbi 21,700 vetë janë shëruar tashmë nga koronavirusi, i cili e shkakton sëmundjen e rrugëve të frymëmarrjes, të njohur si COVID-19.
Në 24 orët e fundit, Ministria e Shëndetësisë e Turqisë tha se janë testuar 38,351 persona.
Nismë globale për të përshpejtuar gjetjen e vaksinës kundër COVID-19
Kombet e Bashkuara i bashkuan forcat edhe me udhëheqës botërorë dhe me sektorin privat në një nismë për përshpejtimin e gjetjes së vaksinës për koronavirus dhe për sigurimin e qasjes së barabartë për të gjithë.
“Ky është një bashkëpunim i rëndësishëm për të përshpejtuar zhvillimin, prodhimin dhe shpërndarjen e barabartë të vaksinave dhe terapive për COVID-19 [sëmundjen që e shkakton koronavirusi]”, tha shefi i Organizatës Botërore të Shëndetësisë, Tedros Adhanom Ghebreyesus.
"Angazhimi ynë i përbashkët është që t’iu sigurojmë të gjithë njerëzve qasje në të gjitha mjetet për të mposhtur COVID-19", tha ai.
“Të bashkuar, ne mund të luftojmë virusin”, tha Tedros.
Mbledhja, përmes video-konferencës, është bashkudhëhequr nga presidenti i Francës, Emmanuel Macron, presidentja e Komisionit Evropian, Ursula von der Leyen, dhe Melinda Gates nga Fondacioni Bill dhe Melinda Gates.
Aty morën pjesë edhe shefi i OKB-së, Antonio Guterres, dhe liderë botërorë, si kancelarja gjermane, Angela Merkel, dhe presidenti i Afrikës së Jugut, Cyril Ramaphosa.
Në të gjithë botën, mbi 2.7 milionë njerëz janë infektuar me koronavirus, ndërsa mbi 190,000 kanë vdekur.
Infografikë:
Çfarë duhet të veshin të gjithë mjekët?
