Kosovës i shtohen edhe 34 raste me koronavirus
Në Kosovë u konfirmuan të premten edhe 34 raste të reja me koronavirus.
Instituti Kombëtar i Shëndetit Publik (IKSHPK) tha se në total janë testuar 264 mostra të marra nga Klinika Infektive, nga gjurmimi i kontakteve të rasteve në terren, si dhe nga karantina në Qendrën studentore.
“Rastet pozitive janë raste kontakti”, thuhet në njoftimin e IKSHPK-së.
Aty po ashtu bëhet e ditur se janë shëruar edhe tre pacientë, të cilët e çojnë në 162 numrin e përgjithshëm të të shëruarve.
Me shifrat e fundit, numri i të infektuarve me koronavirus në Kosovë shkon në 703.
Nëntëmbëdhjetë pacientë kanë humbur jetën.
Trump nënshkruan paketën e ndihmës prej gati 500 miliardë dollarësh
Presidenti i Shteteve të Bashkuara, Donald Trump, nënshkroi një paketë të ndihmës, në vlerë prej gati 500 miliardë dollarësh, për rimëkëmbjen e ekonomisë së goditur nga pandemia e koronavirusit.
Paketa është edhe një përpjekje e Qeverisë amerikane për të ndihmuar bizneset që është dashur të mbyllen, për të frenuar përhapjen e sëmundjes.
Gjatë pesë javëve të fundit, afro 26 milionë njerëz kanë mbetur pa punë në SHBA.
Trump falënderoi Kongresin që, siç tha, i është përgjigjur thirrjes së tij për ndihmë.
“Fitore e jashtëzakonshme”, tha Trump.
“Shumë mirë për bizneset e vogla, shumë mirë për punëtorët”, shtoi ai.
Shtetet e Bashkuara janë vendi më i prekur në botë nga koronavirusi.
Të premten, numri i viktimave atje ka kaluar 50,000, ndërsa i të infektuarve është mbi 880,000.
Në gjithë botën, mbi 2.7 milionë njerëz janë infektuar dhe mbi 194,000 kanë vdekur.
Krasniqi: Më shumë të shëruar, sesa të spitalizuar në QKUK
Infektologu në Klinikën Infektive në Qendrën Klinike Universitare të Kosovës, Valbon Krasniqi, tha se në gjashtë javët e pandemisë së koronavirusit në Kosovë, më shumë ka të shëruar, sesa të spitalizuar në Klinikë.
Në një postim në rrjetin social Facebook, Krasniqi tha se “sonte në Klinikë janë vetëm 47 pacientë - numri më i vogël në këto dy javët e fundit”.
Në Kosovë, 669 persona janë infektuar me koronavirus.
Numri i viktimave është 19, ndërsa i të shëruarve 159.
Rastet e para me koronavirus në Kosovë janë shfaqur më 13 mars.
Guvernatori i Nju Jorkut: Lakorja e të infektuarve po bie
Duke folur në konferencën e përditshme për media, guvernatori i Nju Jorkut, Andrew Cuomo, tha se të githa provat sugjerojnë se lakorja e të infektuarve me koronavirus në këtë shtet “është duke shkuar teposhtë”.
Cuomo tha se shteti duhet t’i heqë gradualisht masat e izolimit; përndryshe, “i gjithë përparimi që kemi bërë, do të dështojë”.
Nju Jorku ka raportuar të premten për 422 viktima nga koronavirusi.
Shifra paraqet një rënie të lehtë nga e enjtja, kur janë regjistruar 438 viktima.
Në aspektin global, Shtetet e Bashkuara kanë numrin më të madh të viktimave nga koronavirusi: mbi 50,000.
Në shtetin e Nju Jorkut kanë vdekur mbi 16,000 pacientë.