Serbia e ndihmon Italinë me pajisje mjekësore
Katër aeroplanë me pajisje mjekësore u nisën të shtunën nga Aeroporti i Beogradit për në Itali – njëri nga vendet më të prekura nga koronavirusi.
Carlo Lo Cascio, ambasador i Italisë në Beograd e falënderoi Serbinë për ndihmën, duke thënë se ky është një “gjest i madh”.
“Kjo është një ndihmë shumë e rëndësishme për ne. Ky material do të jetë shumë i dobishëm për spitalet tona, për të shpwtuar jetë njerëzish nga koronavirusi”, ka thënë Lo Cascio.
Presidenti i Serbisë, Aleksandar Vuçiq tha se ndihma për Italinë përbëhet nga 2 milionë maska kirurgjikale, 2 milionë maska epidemiologjike, 1 milion doreza mbrojtëse dhe pajisje tjera.
“Serbia do t’i dërgojë Italisë tetë aeroplanë me ndihma. Katër sot, dy nesër dhe dy pasnesër. Këto janë mallra që Serbia i ka blerë me paratë e qytetarëve të saj. Italia ka tani më shumë nevojë se ne. Vendi ynë është i furnizuar” tha Vuçiq.
Në kutitë me pajisje mbrojtëse kundër koronavirusit është shkruar “Ne do të fitojmë së bashku - Itali ji e fortë, Serbia është me ju”.
Italia, pas Shteteve të Bashkuara ka numrin më të madh të viktimave nga koronavirusi: mbi 26,000.
Në Serbi mbi 7,400 persona janë infektuar me koronavirus, ndërsa kanë vdekur 144.
Koronavirusi, sfidë për shëndetin mendor
Kriza nëpër të cilën po kalon bota me koronavirusin e ri që shkakton sëmundjen COVID-19, po reflektohet negativisht edhe në Maqedoninë e Veriut, në të gjitha sferat e jetës, përfshirë edhe shëndetin mendor të qytetarëve. Frika nga infektimet, por edhe frika nga transmetimi i sëmundjes te të afërmit, kufizimi i kontakteve sociale, izolimi dhe shqetësimet për gjendjen ekonomiko-sociale, sipas ekspertëve, janë disa nga faktorët që mund të dëmtojnë shëndetin mendor.
Profesori i shkencave sociale në Universitetin e Evropës Juglindore, Ali Pajaziti, thotë se koronavirusi do të ketë pasoja në përditshmërinë e njerëzve, pasi siç thotë, i ka bërë ata sikur jetojnë në një spital global me psikologjinë e traumës, të sëmundjes e të patologjive të ndryshme, duke ndjerë stres e turbulenca mentale.
“Virusi ka ndryshuar mënyrën tonë të jetesës dhe kjo shkakton pasoja të cilat mund të jenë të hëpërhëshme dhe afatgjata. Të jetuarit brenda katër mureve nuk është gjendje e natyrshme për qenien njerëzore, e cila ka nevojë të dalë jashtë, të komunikojë me njerëzit e tjerë, me natyrën dhe të lëvizë. Dimension tjetër është edhe ai raporteve brenda familjare, por edhe problemet ekonomike të cilat tani janë edhe më të dukshme në krahasim me ditët e para të shfaqjes së virusit te ne”, thotë Pajaziti.
Artikullin e plotë e gjëni këtu.
Barnatoret në Nju Jork do të kryejnë teste për koronavirus
Guvernatori i Nju Jorkut, Andrew Cuomo do të nënshkruajë një urdhër ekzekutiv për t’iu lejuar barnatoreve që të kryejnë teste për koronavirus.
Guvernatori Cuomo ka thënë se këto masa do të krijojnë “një rrjet prej më shumë se 5,000 barnatoreve si vende për testim”.
Ai po ashtu ka thënë se kriteri i testimit do të zgjerohet, ashtu që në testim të përfshihen punëtorët shëndetësorë të frontit të parë.
Sipas tij, numri i personave të vdekur me koronavirus është rritur për 437, në krahasim më 422 në krahasim me një ditë më parë.
Megjithatë, ai ka thënë se numri i pacientëve të hospitalizuar për shkak të virusit ka rënë për rreth 1,100 për ditë.
Shtetet e Bashkuara janë prekur më së keqi në botë nga koronavirusi i ri.
Sipas të dhënave të Universitetit Johns Hopkins, deri më tani në SHBA janë regjistruar mbi 900,000 të infektuar dhe mbi 50,000 të vdekur si pasojë e sëmundjes Covid-19, që shkakton koronavirusi.
Italia shënon Ditën e Çlirimit me flamuj dhe këngë
Banorët e Italisë e kanë shënuar Ditën e Çlirimit, larg grumbullimit dhe daljes jashtë shtëpive, sikurse zakonisht. Për dallim nga e kaluara, ata kanë vënë flamuj në dritaret e tyre dhe kanë kënduar këngë rezistence.
Të shtunën ky vend ka festuar 75-vjetorin e çlirimit të Italisë nga pushtimi nazist.
Zakonisht veteranët kanë marshuar nëpër qytetet e gjithë shtetit, mirëpo këto ngjarje janë anuluar pas pandemisë me koronavirus.
E gjithë Italia është izoluar nga 9 marsi, derisa afro 26,000 persona kanë vdekur gjatë kësaj kohe nga sëmundja Covid-19, që shkakton koronavirusi.
Në orën 15:00 njerëzit kanë kënduar këngën, Bella Ciao, një himn i rezistencës.
Ministri italian i Mbrojtjes, Lorenzo Guerin u ka bërë thirrje njerëzve që të tejkalojnë krizën duke përmendur vlerat e unitetit dhe solidaritetit përgjatë rezistencës së treguar në Luftën e Dytë Botërore.