Jetimoret bjelloruse kërkojnë ndihmë pas përhapjes së koronavirusit
Të paktën 23 persona janë infektuar me koronavirusin e ri në një jetimore për fëmijë me nevoja të veçanta në Bjellorusi.
Jetimorja Vesnova në qendër të rajonit Hlusk është shtëpi për 174 fëmijë dhe të rinj me nevoja të veçanta dhe sistem të dobët imunitar.
Të enjten është bërë e ditur se 10 pjesëtarë të stafit dhe 13 fëmijë janë prekur nga sëmundja Covid-19 që shkakton koronavirusi.
Ky institucion i ka kërkuar Qeverisë bjelloruse për t’i zhvendosur të sëmurët në hotele apo hapësira tjera akomodimi.
Themeluesja e jetimores, Adi Roche ka thënë se situata është “kritike” dhe se disa fëmijë janë “jashtëzakonisht të sëmurë”.
“Nuk kemi ilaçe. Ne jemi shumë të shqetësuar dhe ndihemi që nuk mund të braktisim fëmijët”, ka thënë ajo për transmetuesin publik irlandez, RTE.
Sipas të dhënave të Universitetit Johns Hopkins, deri më tani në Bjellorusi është raportuar për 8,773 persona të infektuar dhe 67 të vdekur si pasojë e koronavirusit të ri.
Mbi 2,700 të vdekur nga koronavirusi në Turqi
Numri i të vdekurve nga koronavirusi në Turqi është rritur për 106, duke e çuar numrin total të viktimave në 2,706 kanë thënë autoritetet të shtunën.
Ministria e Shëndetësisë ka konfirmuar edhe për 2,861 persona tjerë të infektuar në 24 orët e fundit, që i bie se numri total i të infektuarve në këtë shtet ka arritur në 107,773.
Sipas të dhënave të Universitetit Johns Hopkins, Turqia është shteti i shtatë me numrin më të madh të të prekurve nga sëmundja Covid-19, që shkakton koronavirusi.
Autoritetet turke kanë marrë vendim të enjten për izolim katërditor në 31 provinca me qëllim të luftimit të koronavirusit.
Ky vendim është marrë në kohën e nisjes së Muajit të Shenjtë të Ramazanit.
Ka pasur raportime se presidenti turk, Recep Tayyip Erdogan ka tentuar ta ndalë valën e virusit pa e mbyllur krejtësisht ekonominë.
Megjithatë, mjekët, unionet tregtare dhe opozita janë ankuar se presidenti nuk ka marrë masa mjaftueshëm.
Sopranoja kosovare që po afron publikun me operën
Kohën e izolimit, sopranoja kosovare, Arta Jashari, po e shfrytëzon për të përkthyer veprat e famshme të operës në gjuhën shqipe, në mënyrë që ta afrojë edhe më shumë publikun kosovar me artin e operës.
Mbi 200,000 persona të vdekur nga koronavirusi në botë
Sipas të dhënave të Universitetit Johns Hopkins, mbi 200,000 persona kanë vdekur si pasojë e koronavirusit në gjithë botën.
Deri më tani është raportuar për mbi 2.8 milionë persona të prekur me sëmundjen Covid-19, që shkakton koronavirusi i ri.
Këto të dhëna janë bërë të ditura pasi numri i viktimave në Shtetet e Bashkuara ka arritur në mbi 50,000.
SHBA-ja përndryshe përbën territorin e prekur më së keqi nga kjo sëmundje.
Më 11 janar, media shtetërore kineze ka raportuar rastin e parë të infektimit me këtë virus, dhe nga ajo kohë, ai është përhapur në më shumë se 210 shtete dhe territore.
Përveç Evropës, Organizata Botërore e Shëndetësisë ka ngritur alarmin për trendin e përhapjes së kësaj sëmundjeje në Afrikë, Evropën Lindore, Amerikën Qendrore dhe Amerikën Jugore.