Nju Jorku do të lejojë që farmacitë të kryejnë teste për koronavirus
Shteti i Nju Jorkut – epiqendra e shpërthimit të koronavirusit në SHBA – do të lejojë farmacitë që të kryejnë teste për COVID-19, tha guvernatori i këtij shteti.
Guvernatori Andrew Cuomo tha se rreth 5 mijë farmaci do të kryejnë teste, me qëllim brenda një dite, farmacitë të arrijnë të kryejnë 40 mijë teste.
Coumo tha se edhe testet për antitrupa tashmë do të kryhen në katër spitale të Nju Jorkut. Sipas guvernatorit, në Nju Jork ka filluar që të bie numri i personave që shtrihen në spital si pasojë e koronavirusit, megjithatë ai u bëri thirrje njerëzve që të vazhdojnë të kenë kujdes dhe t’u përmbahen rekomandimeve të autoriteteve shëndetësore.
Shtetet e Bashkuara kanë mbi 938 mijë raste të konfirmuara me COVID-19, sëmundja që shkaktohet nga koronavirusi dhe mbi 53 mijë të tjerë kanë vdekur. Pothuajse një e treta e vdekjeve nga virusi ka ndodhur në qytetin e Nju Jorkut.
Edhe 28 raste të reja me koronavirus në Kosovë
Instituti Kombëtar i Shëndetit Publik në Kosovë ka konfirmuar të shtunën edhe 28 raste të reja me koronavirus, pas restimit të 292 mostrave.
Ky Institut po ashtu ka njoftuar edhe për një rast të vdekjes nga ky virus në Kosovë, duke e rritur shifrën totale të viktimave në 20.
“Rastet pozitive janë raste kontakti, katërmbëdhjetë (14) raste me vendbanim në Rahovec, katër (4) raste me vendbanim në Gjilan, dy (2) raste nga komuna e Pejës (sipas vendbanimit: një (1) rast Pejë dhe një (1) rast Bllagajë), dy (2) raste nga komuna e Kaçanikut (sipas vendbanimit: një (1) rast Runjevë dhe një (1) rast Dubravë), dy (2) raste me vendbanim në Lladrovc-Malishevë, dy (2) raste me vendbanim në Zhur-Prizren, dhe me nga një (1) rast vendbanimet: Prishtinë dhe Gurrakoc-Istog”, është thënë në njoftim.
Marrë paraysh të dhënat e fundit, numri i përgjithshëm i të infektuarve në Kosovë arrin në 731, i të vdekurve 20 dhe i të shëruarve në 165.
Më qëllim të parandalimit të përhapjes së sëmundjes Covid-19, që shkakton koronavirusi, më 15 prill në Kosovë kanë hyrë në fuqi masat e reja të qarkullimit të qytetarëve.
Bazuar në masat e vendosura nga Ministria në detyrë e Shëndetësisë, qytetarët mund të dalin nga shtëpitë e tyre vetëm për 90 minuta në ditë, me qëllim furnizimi.
Orari i daljes është i organizuar në shtatë grupe, nga ora 07:00 deri në 22:30, dhe përcaktohet nga numri i parafundit personal në letërnjoftim.
Këto masa do të vlejnë deri më 4 maj, porse do të shqyrtohen në varësi të rezultateve, jo më vonë se data 30 prill.
Përshëndetjet e së ardhmes?!
Drejtori i Institutit amerikan për Alergji për Sëmundje Infektuese, Anthony Fauci, ka thënë së fundmi: Të jem i sinqertë, nuk besoj se ndonjëherë do të shtrëgojmë duart. Në kohën e koronavirusit, me siguri që dëshironi të bëni përshëndetje në mënyrë të sigurt. Këtu janë disa sugjerime.
Përshëndetjet e së ardhmes?!
Shkon në 20 numri i të vdekurve nga koronavirusi në Kosovë
Klinika Infektive në Qendrën Klinike Universitare të Kosovës ka njoftuar se të shtunën ka vdekur edhe një person nga koronavirusi.
Viktima me inicialet F.G ka qenë 73-vjeçare nga Komuna e Shtimes.
“Pacientja është spitalizuar në Klinikën Infektive me datën 20.04.2020, dhe krahas infeksionit COVID-19 ka qenë e diagnostikuar edhe me sëmundje të tjera kronike”, është thënë mes tjerash në njoftim.
Kjo është vdekja e 20-të nga koronavirusi në territorin e Kosovës.
Duke marrë parasysh të dhënat e fundit, në Kosovë janë infektuar 703 persona derisa 162 janë shëruar nga ky virus.