Dalja e parakohshme nga izolimi “do të ishte e rrezikshme”
Muhammad Munir, virolog në Universitetin Lancaster të Mbretërisë së Bashkuar, thotë se qeveritë dhe zyrtarët e shëndetit publik kanë nevojë për shumë më tepër të dhëna për koronavirusin, përpara se të vendosin për lehtësimin e masave të izolimit. Në një intervistë për Radion Evropa e Lirë, ai thotë se valë e dytë e infektimeve mund të ketë një ndikim edhe më të keq se e para.
Intervistën e plotë mund ta lexoni në këtë link.
Anglia raporton për 336 viktima të reja nga COVID-19
Gjatë 24 orëve të fundit numri i njerëzve që kanë vdekur nga koronavirusi në spitalet e Anglisë është 336.
Numri i përgjithshëm i viktimave ka arritur në 18, 420, njoftoi Shërbimi Kombëtar i Shëndetit.
Pacientët që vdiqën ishin të moshës midis 28 dhe 100 vjeç.
Shifrat për Mbretërinë e Bashkuar në tërësi do të publikohen më vonë gjatë ditës.
Ndërkohë sekretari i Jashtëm britanik, Dominic Raab, ka thënë se duhet ndërmarrë "hapa të kujdesshëm" kur bëhet fjalë për lehtësimin e masave të izolimit.
Ai i tha BBC se është pikëlluese fakti se numri i viktimave në Britani të Madhe është mbi 20,000, por që sipas tij, kjo shifër mund të ishte edhe më e lartë, pa masa të rrepta të kufizimit të lëvizjes.
Rritet numri i të shëruarve nga koronavirusi në Maqedoninë e Veriut
Maqedonia e Veriut ka shënuar numrin rekord të të shëruarve nga COVID-19 brenda një dite.
Ministria e Shëndetësisë ka njoftuar për 126 persona që janë shëruar nga koronavirusi, duke e çuar në 500 numrin e të shëruarve në nivel vendi.
Gjatë 24 orëve të fundit, nga 335 teste të kryera, janë konfirmuar si të infektuar 19 persona, ndërkohë që numri i përgjithshëm i të infektuarve arrin në 1,386. Prej tyre, 825 janë ende pozitiv, dhe po trajtohen në institucione shëndetësore dhe në kushte shtëpiake.
Sa i përket viktimave, Ministria ka njoftuar për dy raste të reja, një në Shkup dhe një tjetër në Kumanovë. Dy personat sipas njoftimit kanë vuajtur edhe nga probleme tjera shëndetësore.
Numri i përgjithshëm i të vdekurve ka arritur në 62.
Infografikë:
Shkupi dhe Tetova gjatë karantinës
Situata me pandeminë në Kroaci po shkon drejt përmirësimit, thonë autoritetet
Në Kroaci gjatë 24 orëve të fundit janë konfirmuar edhe 14 raste me koronavirusin e ri, duke e çuar numrin e përgjithshëm të të infektuarve në 2.030, tha ministri kroat i Shëndetësisë, Vili Berosh.
Ai tha në një konferencë për media se është shënuar edhe një viktimë nga sëmundja COVID019.
Bëhet fjalë për një person që ishte banor i një shtëpie pleqsh, njoftoi Radio Televizioni i Kroacisë.
Në Kroaci, 55 njerëz kanë vdekur deri më tani, ndërsa 1,103 njerëz janë shëruar nga virusi.
Ky vend ka testuar gjithsej 31.622 persona.
Drejtoresha e Klinikës së Sëmundjeve Infektive në Zagreb, Alemka Markotiq, tha se situata po shkon drejt përmirësimit, "siç dëshmohet edhe nga fakti se ka gjithnjë e më shumë vende në spital për pacientë të rinj".
