Në Belgjikë bie numri i pacientëve në spitale
Belgjika ka njoftuar për numrin më të ulët të pacientëve që kanë kërkar ndihmë shëndetësore në spitalet e vendit. Gjatë 24 orëve të fundit vetëm 127 persona kërkuan ndihmë mjekësore.
Ky është numri më u ulët që nga 18 marsi.
Kanë kaluar shtatë javë që prej se ky vend ka ndërmarrë masa të izolimit për të parandaluar përhapjen e koronavirusit të ri.
Numri i përgjithshëm i të infektuarve është 46,687.
Autoritetet kanë njoftuar se që nga 4 maji do të fillojnë me lehtësimin e masave të izolimit.
IKSHPK thotë se është nën presion nga individë dhe organizata të ndryshme
Instituti Kombëtar i Shëndetësisë Publike të Kosovës (IKSHPK), u bën thirrje qytetarëve dhe individëve nga organizata të ndryshme që të ndalin presionet mbi këtë institucion dhe të mos pengojnë punën e tij.
"IKSHPK e kupton shqetësimin e secilit qytetar për statusin e gjendjes së tij shëndetësore, por nuk mund t’i nënshtrohet diktatit të secilit që vet-vlerëson se duhet të testohet, pasi që një përgjegjësi e tillë i takon IKSHPK", thuhet në njoftim.
Instituti nuk emërton asnjë institucion apo individ që ndërlidhet me këto presione të pretenduara.
Sipas IKSHPK-së, nga data 8 shkurt deri më 26 prill 2020, në Laboratorin e Mikrobiologjisë Molekulare, janë testuar gjithsej 6.479 raste të dyshimta në virusin SARS-CoV-2 dhe prej tyre pozitive rezultojnë gjithsej 763 raste.
Kur është koha për të dalë nga izolimi?
Pas disa javësh, e në disa raste muajsh, të izolimit fizik dhe ekonomik, për shkak të koronavirusit, qytetarët dhe udhëheqësit politikë në gjithë botën janë të etur për t’iu dhënë fund këtyre bllokadave. Pyetja është: si?
Pandemia mund të krijojë 'fatkeqësi të të drejtave të njeriut'
Komisionarja e Lartë e Kombeve të Bashkuara për të Drejtat e Njeriut, Michelle Bachelet, u bëri thirrje vendeve të përmbahen nga shkelja e të drejtave të njeriut derisa marrin masa të jashtëzakonshme për të luftuar pandeminë e koronavirusit.
"Vendet po minojnë sundimin e ligjit në emër të luftimit të pandemisë së koronavirusit duke shkaktuar një fatkeqësi për të drejtat e njeriut", tha ajo.
"Masat urgjente nuk duhet të jenë një armë që qeveritë mund ta përdorin për të minuar kundërshtimin, pastaj për të kontrolluar popullatën dhe madje edhe të zgjasin kohën e tyre në pushtet", tha Bachelet.
"Ato duhet të përdoren për të përballuar në mënyrë efektive me pandeminë - asgjë më shumë, asgjë më pak", shtoi ajo.
Komentet e saj erdhën pasi më shumë se 200,000 njerëz kanë vdekur dhe gati tre milionë janë infektuar nga koronavirusi i ri, i cili u shfaq në Kinë në fund të vitit të kaluar.
Bachelet pranoi se shtetet kanë të drejtë të kufizojnë disa të drejta për të mbrojtur shëndetin publik, por ajo këmbënguli që çdo kufizim duhet të jetë i nevojshëm, proporcional dhe jo-diskriminues, dhe gjithashtu i kufizuar në kohëzgjatje, raporton AFP.
