Në Norvegji rihapen disa shkolla fillore
Norvegjia rihapi të hënën disa shkolla fillore, pasi zyrtarët thanë se koronavirusi është nën kontroll.
Rreth 250,000 fëmijë të moshës 6 deri në 10 vjeç u rikthyen në shkolla pas gjashtë javëve të mësimit në distancë.
Megjithatë, për të ruajtur distancën fizike, në klasa do të marrin pjesë nga 15 nxënës.
Qeveria po përgatit një plan për rihapjen e shkollave të tjera, tha ministrja e Arsimit, Guri Melby.
Norvegjia, deri më tash, ka konfirmuar 7,533 raste me koronavirus dhe 193 viktima.
Spitalet e Vuhanit nuk kanë asnjë pacient me koronavirus
Qyteti Vuhan i Kinës, ku ka nisur pandemia globale e koronavirusit, nuk ka më asnjë rast të hospitalizuar, thanë autoritetet shëndetësore.
“Lajmi i fundit është se më 26 prill, numri i pacientëve me koronavirus në Vuhan ka qenë zero, falë përpjekjeve të përbashkëta të stafit mjekësor”, tha zëdhënësi i Komisionit të Shëndetit Kombëtar të Kinës, Mi Feng.
Vuhani ka raportuar 46,452 raste me koronavirus, apo 56 për qind të totalit në Kinë, dhe 3,869 viktima, apo 84 për qind të totalit kombëtar.
Vuhani dhe provinca ku ndodhet ai, Hubei, janë izoluar në fund të janarit për më shumë se dy muaj.
Qyteti vazhdon t’i testojë banorët, pavarësisht daljes nga izolimi.
Koronavirusi besohet se e ka origjinën në një treg kafshësh në Vuhan.
Rastet e para të të infektuarve atje janë raportuar në fund të vitit të kaluar.
Që atëherë janë përhapur në mbi 180 vende të botës; afro tre milionë njerëz janë infektuar dhe mbi 207,000 kanë vdekur.
A paraqet rrezik për shëndetin agjërimi gjatë pandemisë?
Gjatë muajit të Ramazanit, besimtarët myslimanë nuk hanë dhe nuk pinë nga lindja e Diellit deri në perëndim të tij.
Familjet dhe miqtë shpesh mblidhen bashkë për të prishur agjërimin.
Shumë prej 1.8 miliard myslimanëve të botës i frekuentojnë edhe xhamitë më shpesh.
Por, kriza me koronavirus këtë vit ka ndryshuar gjithçka.
Sëmundja, që ka infektuar mbi 2.8 milionë njerëz dhe ka vrarë mbi 200,000 deri më 25 prill, ka rritur frikën se agjërimi mund të paraqesë rrezik shëndetësor, duke dobësuar imunitetin e njerëzve dhe duke i bërë ata më të cenueshëm ndaj marrjes së virusit.
Mbledhjet e shpeshta të familjarëve dhe miqve gjatë Ramazanit kanë ngjallur po ashtu shqetësime për më shumë të infektuar.
Atëherë, a është agjërimi i këshillueshëm gjatë pandemisë?
Lexoni këtu.
Në Kosovë vdes edhe një pacient me koronavirus
Klinika Infektive në Qendrën Klinike Universitare të Kosovës njoftoi të hënën se një pacient i prekur me koronavirus, ka vdekur.
Viktima me inicialet XH.I. ishte 53-vjeçar, nga Komuna e Pejës.
Në njoftimin e Klinikës Infektive thuhet se pacienti është shtruar në këtë repart të dielën, si i dyshuar për COVID-19, sëmundjen që e shkakton koronavirusi.
Ai ka dalë pozitiv me koronavirus dhe ka pasur edhe sëmundje të tjera shoqëruese, thuhet në njoftim.
Në Kosovë, gjithsej janë infektuar 763 persona me koronavirus, 165 janë shëruar dhe me viktimën e fundit, numri i të vdekurve ka shkuar në 22.